काठमाडौं। जापान सरकारले साना तथा मध्यम व्यवसायलाई अमेरिकाबाट लगाइएको आयात करको असरबाट जोगाउन १५ अर्ब ५० करोड डलरभन्दा बढी बराबरको राहत कार्यक्रम सार्वजनिक गरेको छ।
अमेरिकाले जापानसहित धेरै देशका सामानमा १० प्रतिशतको आधारभूत आयात कर तथा सवारी साधन, फलाम र एल्युमिनियममा अझै बढी दरको कर लगाएको छ। जसको प्रत्यक्ष असर जापानी व्यवसायमा परेको छ।
सरकारले साना व्यवसायलाई सहज ऋण, ऋण सर्तमा सहुलियत तथा सरकारी ऋण संस्थामार्फत आर्थिक सहायता प्रदान गर्ने जनाएको छ।
मन्त्रिपरिषद्का मुख्यसचिव योशिमासा हायाशीले भने, ‘अमेरिकी करबाट प्रभावित साना तथा मध्यम व्यवसायलाई पूर्ण समर्थन दिइने छ।’
अमेरिकी राष्ट्रपति डोनाल्ड ट्रम्पले चालु वर्षको मार्च महिनामा जापानका सामानमा २४ प्रतिशत बराबरको ‘प्रतिशोधात्मक’ कर घोषणा गरेका थिए। तर, त्यो निर्णय जुलाईको सुरुसम्म रोकिएको छ।
जापानले ती करहरू पूर्ण रूपमा हटाउन आग्रह गरिरहेको छ। त्यसका लागि सरकारी प्रतिनिधि चाँडै चौथो चरणको वार्ताका लागि अमेरिका जाँदै छन्।
प्रधानमन्त्री शिगेरु इशिबाले आगामी महिना क्यानडामा हुने सात राष्ट्रको शिखर सम्मेलनमा अमेरिकी राष्ट्रपति ट्रम्पसँग प्रत्यक्ष भेटवार्ता गरेर सहमति जुटाउने संकेत दिए।
अर्कोतर्फ, सरकारले बढ्दो बिजुली तथा ग्यासको मूल्यका कारण जनतामा परेको असर कम गर्न आगामी तीन महिनाका लागि दुई खर्ब ८८ अर्ब बराबरको सहयोग प्रदान गर्ने जनाएको छ।
यसले प्रत्येक परिवारको मासिक उपभोग खर्चमा तीन हजार डलरको राहत दिने बताइएको छ। साथै, सरकारले अस्पताल, विद्यालय तथा साना उद्योगलाई थप विशेष सहायता प्रदान गर्ने योजना पनि अघि सारेको छ।
