अमेरिकाले विश्वभर रोक्यो विद्यार्थी भिसा, नेपाली विद्यार्थी पनि प्रभावित

अन्तर्राष्ट्रिय

गृहपृष्ठ
अन्तर्राष्ट्रिय

अमेरिकाले विश्वभर रोक्यो विद्यार्थी भिसा, नेपाली विद्यार्थी पनि प्रभावित

क्यापिटल नेपालबुधबार, जेठ १४, २०८२

काठमाडौं। अमेरिकाले सामाजिक सन्जाल प्रोफाइलको कडा जाँच गर्ने योजनाअन्तर्गत विश्वभरका अमेरिकी दूतावास र कन्सुलर विभागलाई विद्यार्थी भिसा (एफएम र जे) अन्तर्वार्ता तालिका बन्द गर्न निर्देशन दिएको छ। योसँगै नेपालसहित विश्वभरका विद्यार्थी प्रभावित हुनेछन्।

मंगलबार जारी कूटनीतिक सर्कुलरअनुसार राष्ट्रपति डोनाल्ड ट्रम्प प्रशासनले यहुदी विरोधी भावना फैलाउने वा राष्ट्रिय सुरक्षामा खतरा उत्पन्न गर्न सक्ने अन्तर्राष्ट्रिय विद्यार्थीलाई रोक्ने लक्ष्य राखेर यस्तो निर्णय गरिएको हो। अर्को निर्देशन नआएसम्म नयाँ अन्तर्वार्ता तालिका नथप्न निर्देशन दिइएको छ। पहिले नै निर्धारित अन्तर्वार्ता भने जारी रहनेछन्।

विदेश मन्त्रालयका प्रवक्ता ट्यामी ब्रुसले भिसा प्रक्रियामा ढिलाइबारे टिप्पणी गर्न अस्वीकार गर्दै प्रवेश जाँचलाई गम्भीरतापूर्वक लिइने बताएकी छन्। विदेशमन्त्री मार्को रुबियोले गत साता भिसालाई ‘विशेषाधिकार’ भन्दै क्याम्पसमा बाधा पुर्याउने विद्यार्थीको भिसा खारेज गर्ने चेतावनी दिएका थिए। यो कदम हार्वर्ड विश्वविद्यालयमाथि विदेशी विद्यार्थी भर्ना रोक्ने गृह सुरक्षा विभागको प्रयासपछि आएको हो। यद्यपि शुक्रबार अदालतले यसलाई रोकिदिएको थियो।

ट्रम्प प्रशासनले हार्वर्डसँगको १० करोड डलरको सम्झौता रद्द गर्ने र अनुदान ट्रेड स्कुलमा स्थानान्तरण गर्ने योजना बनाएको छ। यसले नेपाली विद्यार्थीलाई पनि असर गर्ने देखिएको छ।

अमेरिकामा उच्च शिक्षा अध्ययनका लागि हजारौं नेपाली जाने गरेका छन्। विश्वभरबाट १० लाखभन्दा बढी अन्तर्राष्ट्रिय विद्यार्थीले अमेरिकाका विभिन्न विश्ववविद्यालयमा अध्ययन गर्छन्। यसअघि लागू सामाजिक सञ्नल जाँचलाई यो निर्देशनले थप विस्तार गर्नेछ।-एजेन्सी

प्रकाशित मिति: बुधबार, जेठ १४, २०८२ १०:५१

प्रतिक्रिया दिनुहोस्