ग्रामीण दूरसञ्चार कोषको रकम मुद्दती निक्षेपमा लगानी गर्न बैंकसँग प्रस्ताव माग

प्रविधि

गृहपृष्ठ
प्रविधि

ग्रामीण दूरसञ्चार कोषको रकम मुद्दती निक्षेपमा लगानी गर्न बैंकसँग प्रस्ताव माग

क्यापिटल नेपाल बिहीबार, असार ५, २०८२

काठमाडौं। नेपाल दूरसञ्चार प्राधिकरणले ग्रामीण दूरसञ्चार विकास कोषमा रहेको रकम मुद्दती निक्षेपमा लगानी गर्न वाणिज्य बैंकहरूसँग सिलबन्दी प्रस्ताव मागेको छ।

प्राधिकरणले राष्ट्र बैंकबाट ‘क’ वर्गका इजाजत प्राप्त बैंकलाई लगानी गर्न चाहेको रकम र दिन सक्ने अधिकतम ब्याजदरसहित प्रस्ताव पेस गर्न सूचना जारी गरेको हो।

इच्छुक बैंकले असार ६ भित्र प्राधिकरणको आर्थिक प्रशासन शाखा, जमलमा सिलबन्दी कोटेसन पेस गर्नुपर्ने सूचनमा उल्लेख छ। प्राधिकरणले ६ महिनादेखि एकवर्षे अवधिका लागि उक्त रकम मुद्दती खातामा राख्नेछ।

प्रस्ताव पेस गर्दा बैंकहरूले आफ्नो पुँजी पर्याप्तता अनुपात, निष्कृय कर्जा प्रतिशत, कर्जा–पुँजी–निक्षेप अनुपात, वैधानिक तरलता अनुपात र खुद तरलता अनुपातजस्ता पाँच वित्तीय सूचक अनिवार्य खुलाउनुपर्नेछ। तोकिएका सूचक २०८१ चैतमा प्रकाशित वित्तीय विवरणमा आधारित हुनुपर्ने सर्त प्राधिकरणको छ।

बैंकले प्रस्ताव गरेको ब्याजदर कम्तीमा १५ दिनसम्म मान्य हुनुपर्ने र तोकिएका विवरण उपलब्ध नगराउने बैंकको प्रस्ताव स्वतः रद्द हुने सूचनामा उल्लेख छ।

दूरसञ्चार सेवाप्रदायकले प्राप्त गरेको वार्षिक आयको २ प्रतिशतले हुन आउने रकम ग्रामीण दूरसञ्चार विकास कोषमा जम्मा गर्नुपर्ने व्यवस्था छ।

ग्रामीण-दूरसञ्चार-विकास-कोष-1750301876.jpg