मेची भन्सारद्वारा १४ अर्ब ४३ करोड राजस्व संकलन, लक्ष्य भेट्याउन मुस्किल

अर्थतन्त्र

गृहपृष्ठ
अर्थतन्त्र

मेची भन्सारद्वारा १४ अर्ब ४३ करोड राजस्व संकलन, लक्ष्य भेट्याउन मुस्किल

क्यापिटल नेपालसोमबार, असार ९, २०८२

झापा। मेची भन्सार कार्यालयले आर्थिक वर्ष २०८१/८२ को ११ महिनामा १४ अर्ब ४३ करोड ९२ लाख ३८ हजार राजस्व संकलन गरेको छ। सोही अवधिका लागि निर्धारित लक्ष्यको ९१.५६ प्रतिशत हो।

कार्यालयका सूचना अधिकारी ईश्वरकुमार हुमागाईंका अनुसार आव २०८१/८२ को जेठसम्म १५ अर्ब ७७ करोड १९ लाख ४६ हजार राजस्व संकलनको लक्ष्य राखेको थियो। गत आव २०८०/८१ को सोही अवधिमा १६ अर्ब ६७ करोड २८ लाख ४० हजार संकलनको लक्ष्य राखिएकामा ७७.५६ प्रतिशतमात्र राजस्व संकलन भएको थियो।

कार्यालयको तथ्यांकअनुसार चालु आवको ११ महिनामा मेची भन्सारबाट पेट्रोलियम पदार्थ आयातबाट ६०.८१ प्रतिशत अर्थात् आठ अर्ब ७८ करोड २७ लाख ७२ हजार सङ्कलन भएको छ।

यसैगरी तरकारी आयातबाट ६२ करोड ४४ लाख ९६ हजार, यातायातका साधन र तिनका पाटपुर्जाबाट ४० करोड ७४ लाख ५० हजार, खनिज उत्पादनबाट २७ करोड ५१ लाख ९१ हजार, कफीबाट २१ करोड ५४ लाख ७० हजार, दलहनबाट २० करोड ७७ लाख ३९ हजार राजस्व संकलन भएको सूचना अधिकारी हुमागाईंले जानकारी दिए।

मेची भन्सारबाट चालू आवको ११ महिनामा २३ अर्ब २८ करोड ३५ लाख ५६ हजार बराबरको वस्तु निर्यात हुँदा २३ करोड ७५ लाख १९ हजार राजस्व संकलन भएको छ। यसैगरी सोही अवधिमा ४० अर्ब ७७ करोड ६ लाख ४८ हजार बराबरको वस्तु आयात गरिँदा १४ अर्ब २० करोड १७ लाख १८ हजार राजस्व संकलन भएको छ।–रासस

प्रकाशित मिति: सोमबार, असार ९, २०८२ ०६:५६

प्रतिक्रिया दिनुहोस्