काठमाडौं। इजरायलले अमेरिकी राष्ट्रपति डोनाल्ड ट्रम्पको निर्देशनलाई स्वीकार गर्दै इरानसँग द्विपक्षीय युद्ध विरामको प्रस्तावमा सहमति जनाएको छ। योसँगै आजदेखि तेलको मूल्य पाँच प्रतिशतभन्दा बढीले गिरावट आएको हो।
इरान–इजराइलबीच १२ दिने युद्ध अन्त्य हुने भएसँगै ऊर्जा बजारको झट्काको डर कम भएको छ। मंगलबार बिहान करिब ०६५० जिएमटीमा ब्रेन्ट पाँच दशमलव दुई प्रतिशतले घटेर प्रतिब्यारेल ६७ दशमलव ७५ डलरमा झरेको थियो।
मुख्य अमेरिकी कच्चा तेल सम्झौता डब्लुटिआई प्रतिब्यारेल पाँच दशमलव चार प्रतिशतले घटेर ६५ दशमलव ०१ डलर भएको थियो।
‘द्वन्द्वको सम्भावित अन्त्यलाई बजार सहभागीहरूले स्वागत गरेका छन्,’ एमयुएफजीका ली हार्डम्यानले लेखेका छन्। उनले ब्रेन्टले ‘द्वन्द्व सुरु भएदेखि सबै लाभ लगभग पूर्ण रूपमा उल्ट्याएको’ बताए।
इरानले रणनीतिक ‘स्ट्रेट अफ होर्मुज’ हुँदै तेल ढुवानीलाई रोकेर आफ्नो आणविक सुविधा सप्ताहन्तमा अमेरिकी आक्रमणको बदला लिनसक्ने सम्भावनामा सोमबार बिहान कच्चा तेलको मूल्य वृद्धि भएको थियो।
तर, इरानले कतारको प्रमुख अमेरिकी सैन्य अड्डामा क्षेप्यास्त्र प्रहार गरेको र तेल क्षेत्रको सम्पत्ति अप्रभावित रहेको बताएपछि तिनीहरू ७ प्रतिशतसम्म तल झरेको थियो।
–युद्ध प्रिमियम
‘तेहरानले राम्रो खेल्यो। तिनीहरूको ‘प्रतिशोध’ले कतारको अमेरिकी आधारमा प्रहार गर्यो। हेडलाइनका लागि पर्याप्त चर्को, तेल बजारको जग हल्लाउन नसक्ने शान्त,’ एसपिआई एसेट म्यानेजमेन्टका स्टिफन इन्सले भने, ‘र एकचोटि यो स्पष्ट भएपछि युद्धको प्रिमियम कच्चा तेलबाट बाहिर निस्कियो।’
इजरायली सरकारले मंगलबार एक विज्ञप्तिमा इरानसँगको युद्धमा देशले ‘सबै उद्देश्य हासिल गरेको’ र यसले ‘तत्काल दोहोरो अस्तित्वको खतराः आणविक र ब्यालिस्टिक’ हटाएको बताएको छ।
‘इजरायलले युद्ध विरामको कुनै पनि उल्लंघनको कडा जवाफ दिनेछ,’ विज्ञप्तिमा भनिएको छ। एजेन्सी
copy-1750766827.jpg)
