राज्य व्यवस्था समिति सभापतिमा न्यौपानेको मात्र उम्मेद्वारी

राजनीति

गृहपृष्ठ
राजनीति

राज्य व्यवस्था समिति सभापतिमा न्यौपानेको मात्र उम्मेद्वारी

क्यापिटल नेपालमंगलबार, भदौ १०, २०८२

काठमाडौं। प्रतिनिधि सभाअन्तर्गतको राज्य व्यवस्था तथा सुशासन समितिको रिक्त सभापति पदमा नेपाली कांग्रेसकी सांसद ईश्वरीदेवी न्यौपानेको मात्र उम्मेद्वारी परेको छ।

उनको उम्मेद्वारीको प्रस्तावकमा नेपाली कांग्रेसका सांसद रामहरि खतिवडा र समर्थकमा नेकपा एमालेका सांसद कृष्णगोपाल श्रेष्ठ रहेका थिए। न्यौपाने सोही समितिकी सदस्य थिइन्।

आज दिउँसो १ बजेदेखि ४ बजेसम्म उम्मेद्वार मनोनयन गर्ने कार्य तालिका रहेकामा उनले दिउँसो ३ बजे मनोनयन दर्ता गराएकी थिइन्।

सभापतिमा उनको उम्मेद्वारी दर्ता गराउन नेपाली कांग्रेसका प्रमुख सचेतक श्यामकुमार घिमिरे र एमालेका मुख्य सचेतक महेशकुमार बर्तौलासमेत गएका थिए। समितिको भोलि बस्ने बैठकमा प्रस्तावकले एक मात्र प्रस्ताव परेको जानकारी दिएपछि उनी निर्विरोध भएको घोषणा गरिने छ।

संसदीय सुनुवाई समितिको सभापतिको जिम्मेवारीमा रहेकी न्यौपानेले आजै मात्रै सभामुख समक्ष उक्त पदबाट राजीनामा दिएकी थिइन्।

पार्टीको आजै बसेको पदाधिकारी बैठकले उनलाई सभापतिको उम्मेदवार बनाउने निर्णय गरेको थियो। सो पदका लागि बुधबार निर्वाचन हुँदै छ। कांग्रेसकै सांसद रामहरि खतिवडाले सभापतिबाट राजीनामा दिएपछि उक्त पद रिक्त थियो। उनीमाथि कर्मचारीको कुलिङ पिरियडमाथि छेडखानी गरेको आरोप छ।

प्रकाशित मिति: मंगलबार, भदौ १०, २०८२ १७:०४

प्रतिक्रिया दिनुहोस्