रामेछाप। कुनै बेला व्यस्त हुने गरेको रामेछाप विमानस्थल पछिल्लो समय सुनसान छ। विमानस्थबाट नियमित उडान नहुँदा सुनसान भएको हो।
काठमाडौंमा रहेको त्रिभुवन अन्तरराष्ट्रिय विमानस्थलबाट पूर्वी क्षेत्रको नजिकै रहेको विमानस्थलका रूपमा रहेको यो विमानस्थल अहिले हवाईजहाज नचल्दा सुनसान भएको हो। पर्यटकीय समयमा मात्र सोलुको लुक्ला जाने बेला विमानस्थलबाट उडान भर्ने गरिन्छ।
त्यसबेला काठमाडौंको त्रिभुवन अन्तरराष्ट्रिय विमानस्थल बढी व्यस्त हुने भएकाले विदेशी पर्यटकलाई काठमाडौँबाट सडकमार्ग हुँदै मन्थली ल्याउने र त्यसपछि हवाईजहाजमार्फत सोलुको लुक्ला पुर्याउने गरिन्छ।
दसैं, तिहार र छठजस्ता चाडपर्व नजिकिँदै गर्दा अन्य जिल्लामा चल्ने विभिन्न एयरलाइन्सले जिल्ला जिल्लामा जान अग्रिम बुकिङ खुला गरे पनि रामेछापका नागरिकका लागि भने हवाईजहाजबट यात्र गर्न कुनै एयरलाइन्सले अग्रिम बुकिङ खुला गरेका छैनन्।
पर्यटकको सिजनमा मात्र विमानस्थल चल्ने भएकाले विमानस्थल वरपरका रहेका होटल तथा पसलहरू पनि यतिखेर सुनसान छन्। जिल्लामा विमानस्थल हुँदाहुँदै पनि रामेछापका नागरिकले यसको सुविधा नपाउनु दुःखको कुरा भएको स्थानीयको भनाइ छ। रामेछापका नागरिकलाई पनि हवाई सुविधा दिलाउने पहल राजनीतिक दल र प्रदेश तथा संघीय सांसदले गर्नुपर्ने स्थानीय वीरेन्द्र श्रेष्ठले बताए।
उनले भने, ‘यहाँका मानिस सडकमार्गमार्फत काठमाडौं जाँदा बीपी राजमर्गको १२५ किमि पार गर्नुपर्छ भने पुष्पलाल मार्गको तामाकोसी–चरीकोट–मुडे हुँदै करिब २०० किलोमिटर दूरी पार गर्नुपर्दछ।’
गत वर्ष असोज १२ को बाढीले पुष्पलाल मार्ग र बीपी राजमार्गको धेरै ठाउँका सडकमा क्षति पुगेकाले यी दुवै मार्ग जोखिमयुक्त छ। जिल्लामा सुविधा सम्मन्न एम्बुलेन्स नभइरहको अवस्था र मन्थलीबाट काठमाडौँका लागि भएका दुईवटा सडक मार्ग पनि भरपर्दा नभएकाले जटिल प्रकृतिका बिरामी काठमाडौँ पठाउन निक्कै समस्या हुने गरेको श्रेष्ठको भनाइ छ।
नजिकिँदै गरेको दसैं तिहारजस्ता पर्वका लागि हिजोआज सहरबाट गाउँ आउनेको संख्या बढ्दै जान लागेको छ। जोखिमपूर्ण सडकमार्गका कारण चाडपर्वमा घर आउनेलाई यात्रा सहज नभएको मन्थली–१ का नारायणदास श्रेष्ठ बताउँछन्।
जिल्लामा हवाई सेवाला निरन्तर गरी पर्यटन प्रवर्द्धनमा समेत टेवा पुर्याउने उद्देश्यका साथ मन्थली नगरले पटकपटक पहल गरे पनि त्यसको टुंगो नलागेको मन्थलीका मेयर लव श्रेष्ठ बताउँछन्।
रामेछापमा लामो संघर्षपछि मात्र एयरपोर्ट कालोपत्रे गर्न सफल भएको, आफ्नो निरन्तर प्रयासले गत वर्ष असोजमा गएको बाढीका कारण मन्थलीबाट काठमाडाँै जाने दुवैतर्फको बाटो अवरुद्ध हुँदा आफूले निकै प्रयास गरेर केही समय हवाई सेवा सुरु भए पनि हाल बन्द भइको पूर्वराज्यमन्त्री एवं संघीय सांसद पूर्णबहादुर तामाङले बताए।
सोलुको लुक्लासम्मका लागि सीता, तारा र समिट एयरका एयरलाइन्सले यस एयपोर्टबाट पर्यटक ओसार्ने सिजनका बेला ६० देखि ६५ वटासम्म उडान भर्ने गरेका छन्। ती एयसलाइन्सका जहाजमार्फत आलोपालो प्रणालीद्वारा जिल्लाका नागरिक र बिरामीलाई पनि सेवा दिने गरी आफ्ना कार्यक्रम सञ्चालन गर्नुपर्ने मन्थली–२ का स्थानीय गुञ्जबहादुर श्रेष्ठले बताए।–रासस
-1757133706.jpeg)
