बुकेनी र धापुङ गाउँ जोड्न झोलुंगे निर्माण, २०० घरपरिवार लाभान्वित

पूर्वाधार

गृहपृष्ठ
पूर्वाधार

बुकेनी र धापुङ गाउँ जोड्न झोलुंगे निर्माण, २०० घरपरिवार लाभान्वित

क्यापिटल नेपाल मंगलबार, कात्तिक ११, २०८२

म्याग्दी।मंगला गाउँपालिका–४ को न्यूखोलामा निर्माण भएको झोलुंगे पुलबाट करिब २०० परिवार लाभान्वित भएका छन्। पुलले एक घन्टाको यात्रावधि ३० मिनेटमा छोटिएको छ।

म्ंगला गाउँपालिकाले वडा कार्यालय रहेको बुकेनी र धापुङ गाउँ जोड्ने बाटोमा पर्ने खोलामा ९२ दशमलव पाँच मिटर लामो झोलुंगे निर्माण गरेको हो। पुल बनेपछि खोल्सा र जंगलमा घुमाउरो बाटो हिँड्नुपर्ने समस्या हटेको उपभोक्ता समिति अध्यक्ष सविता रोकाले बताइन्।

‘धापुङ र महेशका बासिन्दालाई वडा कार्यालय जान एक घन्टाको बाटो ३० मिनेटमा छोटिएको छ’, उनले भनिन्, ‘बर्खामा न्युखोलामा बाढी आउँदा जोखिम मोलेर वारपार गर्नुपर्ने बाध्यता पनि हटेको छ।’

कुल ५७ लाख १० हजार ८६० लगानीमा उपभोक्ता समितिले निर्माण गरेको पुलबाट १९३ घरपरिवार लाभान्वित भएका उपभोक्ता समितिले जनाएको छ। उपभोक्ताले ६४ हजार ९६१ बराबरको श्रमदान गरेका छन्। ११ लाख ६६ हजार ४२४ मा स्टिल पार्टस् खरिद र उपभोक्ता समितिलाई ३१ लाख ८३ हजार ९१ भुक्तानी भएको छ।

पुलको सोमबार प्रतिनिधिसभाका निवर्तमान सदस्य तथा पूर्वराज्यमन्त्री खमबहादुर गर्बुजाले उद्घाटन गरे। झोलुंगे निर्माण भएकामा स्थानीयले नाचगान गरेर खुसीयाली मनाएका छन्।–रासस

प्रकाशित मिति: मंगलबार, कात्तिक ११, २०८२ ०८:३३

प्रतिक्रिया दिनुहोस्