तत्कालीन गुप्तचर प्रमुख थापासँग आयोगले लियो बयान

राजनीति

गृहपृष्ठ
राजनीति

तत्कालीन गुप्तचर प्रमुख थापासँग आयोगले लियो बयान

क्यापिटल नेपाल बिहीबार, मंसिर ११, २०८२

काठमाडाौं। गत भदौ २३ र २४ काने जेनजी प्रदर्शनका क्रममा भएको हताहतीबारे छानबिन गरिरहेको उच्चस्तरीय जाँचबुझ आयोगले राष्ट्रिय अनुसन्धान विभागका पूर्वप्रमुख (मुख्य अनुसन्धान निर्देशक) हुतराज थापासँग बयान लिएको छ। आयोगले थापासँग बुधबार बेलुकी बयान लिएको हो।

थापा गत भदौ २८ मा अनुसन्धान निर्देशकको तीनवर्षे पदावधि पूरा गरेर सेवा निवृत्त भएका थिए। जेनजी प्रदर्शन हुँदा उनी गुप्तचर प्रमुख थिए। गौरीबहादुर कार्की नेतृत्वको आयोगले जेनजी प्रदर्शनको पहिलो दिन भदौ २३ मा २२ किशोरको ज्यान जाने गरी गोली चलाउनुपर्ने कारण र २४ को विध्वंसबारे जाँचबुझ गर्ने कार्यादेश पाएको छ। असोज ९ बाट काम सुरु गरेको आयोगले तीन महिनाभित्र प्रतिवेदन पेस गर्नुपर्नेछ।

आयोगले यसअघि बुधबार सेवानिवृत्त पूर्वमुख्यसचिव एकनारायण अर्यालसँग सोधपुछ गरेको थियो।

आयोगले राष्ट्रिय अनुसन्धान विभागको उपत्यका हेर्ने डीआईजी कृष्ण खनाल, उपत्यका प्रहरी कार्यालय रानीपोखरीका निमित्त प्रमुख ओम राना, सशस्त्र प्रहरीका डीआईजी सुरेश श्रेष्ठ र नेपाल प्रहरीका एसपीद्वय अपिल बोहरा र कुलदीप चन्दसँग बयान लिइसकेको बताइएको छ।

सशस्त्रका डीआईजी श्रेष्ठ उपत्यका हेर्ने नम्बर नम्बर–९ पशुपतिनाथ वाहिनी प्रमुख हुन् । उपत्यका प्रहरी कार्यालयबाट सरुवा भएर सुदूरपश्चिम प्रदेशमा गएका डीआईजी ओम रानाको बयान पनि बुधवार साँझ लिइएको बताइएको छ।

प्रकाशित मिति: बिहीबार, मंसिर ११, २०८२ ११:३३

प्रतिक्रिया दिनुहोस्