काठमाडौं। चाडवाडको समयमा मात्रै बजार अनुगमन गरेको र अन्य समयमा भने चुपचाप बस्ने गरेको भनेर वाणिज्य, आपूर्ति तथा उपभोक्ता संरक्षण विभागप्रति गुनासो हुने गरेको थियो। तर, विभागका पछिल्ला गतिविधि र बजार अनुगमनलाई तीव्र पारेको छ।
विभागले शुक्रबार मात्रै काठमाडौंका विभिन्न आठ उद्योग तथा फर्म अनुगमन गरेको थियो। त्यसक्रममा क्रिस्टल स्टोर तारकेश्वर गोलढुंगालाई दुई लाख पाँच हजार जरिवाना गरेको छ।
विभागले अनुगमनका क्रममा उपभोक्ता संरक्षण ऐन, २०७५ अनुसार वस्तु तथा सेवाको वास्तविक गुणस्तर, परिमाण, मूल्य नापतौल, ढाँचा वा बिक्री वा प्रदान गर्ने कार्यलाई अनुचित व्यापारिक तथा व्यवसायजन्य क्रियाकलाप गरेको भेटिस्पछि कारबाही गर्छ।
ऐनको दफा ३९ मा ‘बजार अनुमगन, निरीक्षण, जाँचबुझ वा खानतलासीको क्रममा तत्काल प्राप्त प्रमाणबाट वस्तुको उत्पादक, ढुवानीकर्ता, सञ्चयकर्ता, पैठारीकर्ता, बिक्रेता वा सेवा प्रदायकले देहायको कुनै कसुर गरेको देखिए निजलाई निरीक्षण अधिकृतले जरिवाना गर्न सक्ने उल्लेख छ। ऐनअनुसार अनुचित व्यापारिक क्रियाकलाप गरेको पाइएको खण्डमा निरीक्षण अधिकृतले अधिकतम दुई लाखदेखि तीन लाखसम्म जरिवाना गर्न सक्नेछन्।
काठमाडौं महानगरपालिका–३१ नयाँ बानेश्वरमा अवस्थित घुम्ने किचेनलाई २० हजार जरिवाना गरेको छ। सिनामंगलको ग्रिन बड्स बेकरी क्याफेलाई पाँच हजार जरिवाना गरेको छ।
ललितपुरको सुमेरु अस्पताल परिसरमा रहेको क्यान्टिनलाई व्यवसायसँग सम्बन्धित कागजात लिई तीन दिनभित्र विभागमा उपस्थित हुन निर्देशन दिएको छ । अन्य तीन फर्मलाई भने सामान्य निर्देशन दिइएको विभागले जनाएको छ।
