काठमाडौं। नेपाल चेम्बर अफ कमर्सले हीरक जयन्ती अवसरमा काठमाडौंमा वाकाथन कार्यक्रम आयोजना गरेको छ। मुलुकको समग्र चेम्बर अभियानको ७५औं ऐतिहासिक वर्षगाँठ अवसरमा चेम्बरले यो वर्ष विभिन्न कार्यक्रम आयोजना गर्दै आएको छ।
हीरक जयन्ती मूल समारोह समितिको समन्वयमा शिक्षा तथा खेलकुद समितिद्वारा जमलस्थित चेम्बर भवनबाट सुुरु भएको वाकाथन कार्यक्रम रानीपोखरी, नेपाल उलहाउस, जनबहाल, मखन, दरबार स्क्वायर हुँदै झोंछेमा गएर समापन भएको थियो।
हीरक जयन्ती मूल समारोह समितिका सभापति एवं चेम्बरका पूर्वअध्यक्ष राजेशकाजी श्रेष्ठको अगुवाइमा आयोजित कार्यक्रममा चेम्बरका पदाधिकारी, कार्यसमिति सदस्य, निजी क्षेत्रका प्रतिष्ठित खेलाडीलगायत करिब ३ सय जनाको सहभागिता रहेको थियो।
चेम्बरको ऐतिहासिक हीरक जयन्ती अवसरमा आयोजित कार्यक्रमलाई सम्बोधन गर्दै सभापति राजेशकाजी श्रेष्ठले निजी क्षेत्रको सबैभन्दा पुुरानो संस्था चेम्बरले स्थापनाको ७५औं वर्षगाँठलाई भव्य रुपले सम्पन्न गर्न यो वर्ष विभिन्न कार्यक्रम आयोजना गरिएको बताए। वर्तमान अवस्थामा उद्यमी व्यवसायीको मनोवल उकास्न पनि यस्ताखाले कार्यक्रम आयोजना गरिएको जानकारी दिए।
चेम्बर अध्यक्ष कमलेशकुमार अग्रवालले वाकाथनका क्रममा काठमाडौंका विभिन्न स्थानको परिक्रमा ऐतिहासिक महत्त्वका स्थलको प्रवर्द्धन गर्न महत्त्वपूूर्ण भएको बताए। चेम्बरको शिक्षा तथा खेलकुुद समिति सभापति रुपक राजवंशीले कार्यक्रममा सहभागीलाई धन्यवाद दिए।
साढे ७ दशकदेखि क्रियाशील निजी क्षेत्रको प्रतिनिधिमूलक पहिलो सस्ंथा नेपाल चेम्बर अफ कमर्सले मुलुकको समग्र आर्थिक समृद्धि एवं निजी क्षेत्रको व्यावसायिक क्षमता अभिवृद्धिका लागि गरेका विभिन्न गतिविधिलाई हीरक जयन्ती अवसरमा उजागर गरिनेछ।
