काठमाडौं। नेपाल विद्युत् प्राधिकरणले डेडिकेटेड र ट्रंक लाइनको बक्यौता विवादमा पहिलो किस्ता बुझाएका उद्योगीहरूलाई दोस्रो किस्ता बुझाउन ताकेता गरेको छ।
प्राधिकरणका वितरण केन्द्रहरूले मंगलबारदेखि पहिलो किस्ता बुझाउने उद्योगहरूलाई पत्राचार गर्दै दोस्रो किस्ता बुझाउन भनेको हो।
प्राधिकरणका कार्यकारी निर्देशक मनोज सिलवालले डेडिकेटेड र ट्रंक लाइनको पहिलो किस्ता बुझाएका उद्योगलाई दोस्रो किस्ता पनि समयमा बुझाउन ताकेता सुरु गरेका हुन्।
उद्योगीकाह अनुसार प्राधिकरणले पठाएको पत्रमा पहिलो किस्ता तिरेकोमा धन्यवाद दिँदै समयमै दोस्रो किस्ता बुझाउनेबारे उल्लेख गरिएको छ।
यसअघि प्राधिकरणले बक्यौतालाई २८ किस्तामा तिर्ने सुविधा दिँदै पहिलो किस्ता तिरेपछि लाइन जोड्दै आएको थियो। प्राधिकरणको ताकेतासँगै हुलास स्टिल र अशोक स्टिलले दोस्रो किस्ता पनि बुझाएका छन्।
यसअनुसार अशोक स्टिलले दोस्रो किस्तामा ६३ लाख बुझाएको छ। कम्पनीले कूल १७ करोड ५८ लाख १४ हजार ४०६ रुपैयाँ बक्यौता तिर्न बाँकी छ।
त्यस्तै, हुलास स्टिल इन्डस्ट्रिजले ५० लाख ४३ हजार रुपैयाँ बुझाएको छ। यस कम्पनीको नाममा १४ करोड १२ लाख ५ हजार रुपैयाँ बक्यौता छ।
विं.सं. २०७२ माघदेखि २०७५ वैशाखसम्मको प्रिमियम महसुलबापत ३५ उद्योगको कुल पाँच अर्ब ९४ करोड ५६ लाख रुपैयाँ बक्यौता तिर्न बाँकी थियो। यी उद्योगहरूबाट २३ करोड ८७ लाख ७२ हजार रुपैयाँ असुल भइसकेको छ।
