काबेली इनर्जीले १ अर्ब बढीको संस्थापक सेयर बिक्री खुलायो, आयोजना प्रभावितलाई न्यूनतम १० हजारमै संस्थापक सेयर

सेयर

गृहपृष्ठ
सेयर

काबेली इनर्जीले १ अर्ब बढीको संस्थापक सेयर बिक्री खुलायो, आयोजना प्रभावितलाई न्यूनतम १० हजारमै संस्थापक सेयर

क्यापिटल नेपाल सोमबार, मंसिर १५, २०८२

काठमाडौं। काबेली इनर्जी कम्पनीले १ अर्ब ५ करोड रुपैयाँ बराबरको संस्थापक सेयर सर्वसाधारणका लागि बिक्री खुलाएको छ।

कम्पनीले संस्थापक सेयर लगानीसम्बन्धी प्रावधान सार्वजनिक गर्दै प्रभावित क्षेत्रका जनतालाई सहभागी गराउने पहलस्वरुप संस्थापक सेयर बिक्री खुलाएको हो। आयोजना ताप्लेजुङ र पाँचथरमा पर्छ।

कम्पनीका अनुसार ताप्लेजुङ र पाँचथरका लाभग्राहीले न्यूनतम १० हजार रुपैयाँ बराबरको संस्थापक सेयर लगानी गर्न पाउनेछन् भने जिल्लाका नागरिकका लागि न्यूनतम एक लाख रुपैयाँको सीमा तोकिएको छ।

१ अर्ब पाँच करोड रुपैयाँ बराबरको सेयर संकलन भएपछि आवेदन बन्द हुने कम्पनीले बताएको छ। काबेली इनर्जीले ६२.६० मेगावाट विद्युत् उत्पादन गरी राष्ट्रिय प्रसारण लाइनमा जोडेर आम्दानी गर्ने, बैंक कर्जाको भुक्तानी तथा सेयरधनीलाई लाभांश वितरण गर्ने योजना अघि सारेको छ।

निर्माणाधीन आयोजना १५ महिनाभित्र पूरा गर्ने तयारी छ। पाँचथरको याङवरक गाउँपालिका–६ पिप्लेमा काबेली बि–१ जलविद्युत आयोजना निर्माण भई २०७६ कात्तिक २३ देखि २५ मेगावाट विद्युत नियमित राष्ट्रिय ग्रिडमा जोडिएको छ।

काबेली इनर्जीले बुटवल पावरसँग साझेदारीमा काबेली नदीमै निर्माण भइरहेको ३७.६० मेगावाट क्षमताको काबेली ए जलविद्युत आयोजना समेत अघि बढाइरहेको छ।

सोही आयोजनाका लागि संस्थापक सेयर निष्कासन गरिएको हो। काबेली ए आयोजना निर्माणका लागि ७ अर्ब ५२ करोड रुपैयाँ लागत अनुमान गरिएको छ।

प्रकाशित मिति: सोमबार, मंसिर १५, २०८२ ०८:०७

प्रतिक्रिया दिनुहोस्