दाङ। दाङको तुलसीपुर उपमहानगरपालिका–१६ स्थित औद्योगिकग्राम निर्माणाधीन क्षेत्रमा संरचना बन्न थालेका छन्। अहिले सरसफाइ प्रशोधन गर्ने उद्योगले संरचना निर्माण थालेको छ।
स्मार्ट मल्टिकन्सेप्ट ग्रुप प्रालिले फोहोर संकलन, प्रशोधन गरेर प्लास्टिकजन्य वस्तु निर्माणका लागि कच्चापदार्थ तयार गर्नेछ। सञ्चालक रवीन्द्रविक्रम केसीका अनुसार बजारमा अहिले फोहोर व्यवस्थापन चुनौतीपूर्ण रहेकाले उक्त उद्योग स्थापना गर्न लागिएको हो।
त्यस्तै सोही उद्योगले कृषिजन्य वस्तु खरिद गर्ने, प्रशोधन गरेर बजारीकरण गर्नेसमेत योजना बनाएको उनले बताए। अहिलेको युवा जनशक्तिलाई स्वदेशमै रोक्नुका साथै कृषि क्षेत्रमा देखिएको बजारीकरणको समस्यालाई रोक्न यस्तो कार्य गरिएको उनको भनाइ थियो।
त्यस्तै, तुलसीपुरमा अग्नि नियन्त्रणका लागि फायर फाइटरको ‘रिफुलिङ’समेत गर्ने गरी तयारी गरेको उनको भनाइ छ। ‘हामीले गर्न खोजेको सामाजिक अभियान हो’, उनले भने, ‘यहाँको फोहोर प्रशोधन गरेर रबर उद्योग, कृषिको बजारीकरण र अग्नि नियन्त्रण कार्यमा हाम्रो भूमिका रहनेछ।’ करिब ३३ लाखको लागतमा उक्त संरचना निर्माण गर्न लागेको उनले बताए।
तुलसीपुर उपमहानगर प्रमुख टीकाराम खड्काले सोही उद्योगग्राममा आफै संरचना बनाएर व्यवसाय सञ्चालन गर्न चाहे पाँच वर्षको कर छुट गर्नेसमेत उनको भनाइ थियो। उपमहानगर संरचना बनाए भने न्यूनतम कर तिर्ने व्यवस्था मिलाउने जनाए।
साथै उद्योगग्रामको सुरक्षाका लागि आवाससहित नगर प्रहरीको समेत व्यवस्था गर्ने उनले बताए। ग्वारखोलाको किनारमा उक्त उद्योगग्राम निर्माण हुन लागेको हो, जहाँ एक सय तीन जनाले अतिक्रमण गरेर घर टहरा बनाएका थिए। ती घरटहरा बनाएकालाई प्रति घरलाई डेढ कठ्ठा दिएर उद्योगग्रामका लागि जग्गा छुट्याइएको थियो। हाल १३ बिघा जग्गामा उद्योगग्राम निर्माण गर्न थालिएको छ।
केही समयअघि उद्योगग्रामस्थलमा पर्खालसमेत लगाइएको छ। सोही उद्योगग्राम क्षेत्रमा संरचना निर्माणका लागि उपमहानगरले ५० लाख बजेटसमेत छुट्याइएको छ। औद्योगिक ग्राम निर्माण भए व्यवसायीलाई निकै सहज हुने ग्रिल व्यवसायी ओमबहादुर वलीले बताए। अहिले बजारमा हुँदा निकै समस्या हुने गरेकोसमेत उनको भनाइ छ।
छापाखाना व्यवसायी शालिकराम बस्नेतले पनि उद्योगग्राम निर्माण भए आफूहरूलाई भाडा पनि सस्तो हुने र सहज पनि हुने बताए।–रासस
-1717671934-1731048159.jpg)
