तनहुँमा ७४ हजार ७५५ टन दूध उत्पादन, ११८२ टनले वृद्धि

कृषि

गृहपृष्ठ
कृषि

तनहुँमा ७४ हजार ७५५ टन दूध उत्पादन, ११८२ टनले वृद्धि

क्यापिटल नेपाल शुक्रबार, मंसिर १९, २०८२

काठमाडाैं। पशुपालनमा कृषकको आकर्षण बढेसँगै तनहुँमा दूध उत्पादनमा वृद्धि भएको छ। जिल्लाका स्थानीय तथा भेटेरिनरी अस्पताल तथा पशु सेवाविज्ञ केन्द्रले अनुदानको कार्यक्रम ल्याएपछि कृषक पशुपालनतर्फ आकर्षित भएका छन्। त्यसकारण जिल्लामा दूध उत्पादनमा वृद्धि भएको छ।

आर्थिक वर्ष २०८१/८२ मा जिल्लामा ७४ हजार ७५५ टन दूध उत्पादन भएको कार्यालय प्रमुख रविनसन अधिकारीले जानकारी दिए। अघिल्लो आर्थिक वर्ष २०८०/८१ मा ७३ हजार ५७२ टन दूध उत्पादन भएको थियो। उनका अनुसार एक हजार १८२ टन दूध उत्पादनमा वृद्धि भएको छ।

जिल्लाभर १३ हजार ९९२ दुधालु गाई, २१ हजार ५०३ दुधालु भैँसीको संख्या रहेको कार्यालयले जनाएको छ। दुधालु गाईको सङ्ख्या ३०४ र भैँसीको संख्या २६१ ले वृद्धि भएको छ।

यस्तै, जिल्लामा ऊन उत्पादनसमेत वृद्धि भएको छ। आर्थिक वर्ष २०८१/८२ मा २८९ किलो ऊन उत्पादन भएको छ। आर्थिक वर्ष २०८०/८१ मा २७३ किलो ऊन उत्पादन भएको थियो। जिल्लामा भेडाको संख्या ७२३ रहेको छ।

तनहुँ दूध, मासु र अण्डामा आत्मनिर्भर छ। प्रतिव्यक्ति ९१ लिटर दूध आवश्यकता पर्नेमा ११८.५४ लिटर उपलब्धता रहेको अधिकारीले बताए। त्यस्तै प्रतिव्यक्ति १४ किलो मासु आवश्यक पर्नेमा १४ दशमलव ४१ किलो उपलब्धता रहेको छ। अण्डा ४८ गोटा आवश्यक पर्नेमा ८३ गोटा उपलब्धता छ। दूधमा २७.५४ लिटर, मासुमा शून्य दशमलव ४१ किलो र अण्डामा ३५ गोटाले बढी छ। माछामा भने तनहुँ आत्मनिर्भर बन्न सकेको छैन। प्रतिव्यक्ति सात किलो माछा आवश्यक पर्नेमा ०.२८ किलो मात्रै उपलब्धता छ।

प्रकाशित मिति: शुक्रबार, मंसिर १९, २०८२ १५:३९

प्रतिक्रिया दिनुहोस्