काठमाडौं। बंगलादेशस्थित नेपाली दूतावासको आयोजनामा स्थानीय राजशाहीमा ‘नेपाल–बंगलादेश आर्थिक सहकार्य’ विषयक कार्यक्रम सम्पन्न भएको छ।
कार्यक्रमाई सम्बोधन गर्दै बंगलादेशका लागि नेपालका राजदूत घनश्याम भण्डारीले नेपाल–बंगलादेशबीचको द्विपक्षीय आर्थिक सहकार्यका विभिन्न क्षेत्रमा भएको स्थिर प्रगतिबारे जानकारी गराएका थिए।
उनले ऊर्जा व्यापार, लगानी तथा पर्यटन क्षेत्रमा हासिल भएका उपलब्धि उल्लेख गर्दै यी क्षेत्रमा सहकार्य थप विस्तार हुँदै गएको बताए।
दुई देशबीचको सम्बन्ध सुदृढ बनाउन व्यवसायिक समुदायको भूमिका महत्त्वपूर्ण रहेको उल्लेख गर्दै राजदूत भण्डारीले सहभागीलाई आपसी हितका क्षेत्रमा नेपाली व्यावसायिक साझेदारसँग सहकार्य अझ गहिरो बनाउन आह्वान गरे।
सो अवसरमा दूतावासकी प्रथम सचिव योजना बाम्जनले नेपाल–बंगलादेश आर्थिक सहकार्यका प्रमुख क्षेत्रबारे विस्तृत प्रस्तुति दिएको नेपाली दूतावास बंगलादेशले जनाएको छ। उनले व्यापार, लगानी, सम्पर्क सञ्जाल, शिक्षा तथा जनस्तरको सम्पर्कलगायतका क्षेत्रमा सहकार्य विस्तारका सम्भावनाबारे जानकारी गराइन्।
अन्तरक्रियात्मक सत्रमा सहभागीले उठाएका जिज्ञासा तथा चासोबारे राजदूत भण्डारीले जानकारी गराएका थिए। राजशाहीस्थित विभिन्न सरकारी निकाय तथा व्यावसायिक संघ–संस्थाका प्रतिनिधिले धारणा राखेका थिए।
कार्यक्रममा उद्योग वाणिज्य संघका प्रतिनिधि, प्रतिष्ठित व्यवसायी, ट्राभल तथा टुर उद्यमी, सञ्चारकर्मीलगायतको सहभागिता रहेको थियो।
