कांग्रेस केन्द्रीय कार्यसम्पादन समिति बैठक बस्दै, विशेष महाधिवेशन विवादबारे बहस हुने

राजनीति

गृहपृष्ठ
राजनीति

कांग्रेस केन्द्रीय कार्यसम्पादन समिति बैठक बस्दै, विशेष महाधिवेशन विवादबारे बहस हुने

क्यापिटल नेपाल शुक्रबार, पुस १८, २०८२

काठमाडौं। विशेष महाधिवेशन कि नियमित भन्ने विवादमा जकडिएको नेपाली कांग्रेसको केन्द्रीय कार्यसम्पादन समिति बैठक आज बस्दै छ। पार्टी मुख्यसचिव कृष्णप्रसाद पौडेलले बैठक दिउँसो ३ बजे केन्द्रीय कार्यालय सानेपामा बैठक बस्ने जानकारी दिएका हुन्।

बैठकमा केन्द्रीय कार्यसम्पादन समितिका पदाधिकारी एवं सदस्यलाई उपस्थिति हुन भनिएको छ। बैठकमा महाधिवेशन विवादबारे छलफल हुने नेताहरूले बताएका छन्। बिहीबार महामन्त्रीद्वय गगन थापा र विश्वप्रकाश शर्माले संयुक्त रूपमा विज्ञप्ति जारी गरेर नियमित महाधिवेशन स्थगित गर्दै अबको विकल्प विशेष महाधिवेशन भएको बताएका थिए।

महामन्त्रीद्वयले नियमित महाधिवेशन हुन नसकेको अवस्थामा पार्टी विधानको दफा १७ (२) बमोजिम विशेष महाधिवेशनसम्बन्धी मागलाई सम्बोधन गर्नु केन्द्रीय कार्यालयको जिम्मेवारी भएको स्मरण गराएका छन्। कांग्रेसमा विशेष महाधिवेशन माग्दै गत असोज २९ गते २ हजार ४८८ महाधिवेशन प्रतिनिधिले हस्ताक्षर बुझाएका थिए।

यद्यपि संस्थापनले दस्तखतलाई फेक भनेको छ।

महामन्त्रीद्वय थापा र विश्वप्रकाशले बिहीबार नियमित महाधिवेशन स्थगित गर विशेष महाधिवेशन बोलाउनुपर्ने बताउँदै यसबारे कुरा सभापति शेरबहादुर देउवासँग भेट्ने प्रयास गरे पनि सफल भएका थिएनन्।

कार्यसम्पादन समिति बैठक बोलाउनुअघि सभापति देउवाले आफूपक्षीय शीर्ष नेतासँग छलफल गरेका थिए। संस्थापन पक्षले महामन्त्रीद्वयको घोषणा अवैधानिक भनेको छ भने गगन/विश्वले पार्टी विधानअनुसार नै भएको दाबी गरेका छन्।

प्रकाशित मिति: शुक्रबार, पुस १८, २०८२ ०८:०२