पेस भयो नेप्से पुनर्संरचना प्रतिवेदन, अध्ययन गर्दै अर्थमन्त्री खनाल

अर्थतन्त्र

गृहपृष्ठ
अर्थतन्त्र

पेस भयो नेप्से पुनर्संरचना प्रतिवेदन, अध्ययन गर्दै अर्थमन्त्री खनाल

क्यापिटल नेपाल सोमबार, पुस २८, २०८२

काठमाडौं। नेपाल स्टक एक्सचेन्ज (नेप्से) संरचना, प्रणाली र सञ्चालनमा सुधार ल्याउने उद्देश्यसहित तयार भएको प्रतिवेदन अर्थमन्त्री रामेश्वर खनाललाई पेस गरिएको छ।

अध्ययन समिति संयोजक प्रकाशजंग थापा नेतृत्वले बुझाएको प्रतिवेदन अर्थमन्त्री खनालले अध्ययन गरिरहेका छन्। अर्थ मन्त्रालय स्रोतका अनुसार सुरुमा अर्थमन्त्री खनालले पूर्ण पाठ अध्ययन गर्ने र त्यसपछि मात्र प्रतिवेदन सार्वजनिक गर्ने तयारी छ।

अर्थमन्त्री खनालले पहिलो चरणमा आफूले कुन कुन विषय तत्कालै पूरा गर्न सकिन्छ र पछि के गर्ने भन्ने विषयमा प्रतिवेदनका आधारमा निर्णय गर्ने तयारी छ। सम्भव भएसम्म धेरैभन्दा धेरै विषय कार्यान्वयन गर्ने सोच अर्थमन्त्री खनालको रहेकाले पनि तत्कालै प्रतिवेदन सार्वजनिक नगरिएको जनाइएको छ।

सरकारले मंसिर २ मा नेप्से संरचना, प्रणाली तथा सञ्चालन सुधारका लागि उच्चस्तरीय सुझाव समिति गठन गरेको थियो। समितिमा नेप्से, नेपाल धितोपत्र बोर्ड र नेपाल राष्ट्र बैंकका प्रतिनिधि सदस्यका रूपमा छन् भने अर्थ मन्त्रालयका उपसचिव शरद निरौलालाई सदस्यसचिव छन्।

प्रकाशित मिति: सोमबार, पुस २८, २०८२ १३:४२

प्रतिक्रिया दिनुहोस्