रेलमार्गबाट आउने सामान ढुवानीको ढिलाइबारे समन्वय गर्न सरकारको निर्देशन

अर्थतन्त्र

गृहपृष्ठ
अर्थतन्त्र

रेलमार्गबाट आउने सामान ढुवानीको ढिलाइबारे समन्वय गर्न सरकारको निर्देशन

क्यापिटल नेपाल मंगलबार, माघ २७, २०८२

काठमाडौं। उद्योग, वाणिज्य तथा आपूर्ति मन्त्रालयले भारतमा रहेका नेपाली दूतावास र महावाणिज्य दूतलाई देशको प्रमुख भन्सार तथा व्यापारिक प्रवेशद्वार वीरगञ्जतर्फ रेलमार्गबाट आयात हुने सामानको ढुवानीमा हुँदै आएको ढिलाइबारे ध्यानाकर्षण गराएको छ।

भारतको कोलकाता र विशाखापट्टनम भएर आयात गरिने मालसामान रेकमा लोड गर्न नै अस्वाभाविक रूपमा लामो समय लागिरहेको जनाउँदै आईसीडी वीरगञ्जका लागि हिँडिसकेपछि पनि रेकहरूबीच बाटोमै कुनै स्पष्ट कारणबिना धेरै दिनसम्म रोकिइरहने अवस्था देखिएको उल्लेख गरेको छ।

कतिपय अवस्थामा रेकहरू रक्सौल–वीरगञ्ज नाकाको नजिकै आइपुगेपछि पनि लामो समयसम्म रोकिएको पाइने जनाएको छ। यस्ता समस्याहरु विगत तीन महिनामा पटक-पटक दोहोरिएको देखिएको भन्दै यस प्रकारका ढिलाइ तथा अवरोधका कारण नेपालमा सञ्चालित उद्योगहरुले समयमै कच्चा पदार्थ ढुवानी गर्न नसक्दा समस्या उत्पन्न भएको उल्लेख गरिएको छ।

यसले उद्योगहरु पूर्ण क्षमतामा सञ्चालन हुन नसकी उनीहरुको उत्पादन लागत बढ्न गई प्रतिस्पर्धी क्षमता घट्न गइरहेको छ। साथै, बजार आपूर्तिमा अस्थिरता उत्पन्न भई समग्र राष्ट्रिय अर्थतन्त्रमा नकारात्मक प्रभाव परेको छ।

जस कारण कोलकाता बन्दरगाहमा लोड भइसकेको सामानसहितको रेक वीरगञ्ज सुख्खा बन्दरगाहमा ३-४ दिनभित्र र बिशाखापटनम बन्दरगाहमा लोड भइसकेको सामानको रेक ६-७ दिनभित्रै पुग्ने गरी व्यवस्थाको लागि भारत सरकारका सम्बन्धित निकायहरू, विशेषतः भारतीय रेल्वे विभागसँग उच्च तहमा समन्वय तथा पत्राचार गरी यस समस्याको दीर्घकालीन र प्रभावकारी समाधान खोज्न ध्यानाकर्षण गराएको छ।

प्रकाशित मिति: मंगलबार, माघ २७, २०८२ १७:१०