बालेनलाई सेयर बजारको स्वागत, फेरि लाग्यो दोस्रो सर्किट, ४० मिनेटलाई कारोबार बन्द

सेयर

गृहपृष्ठ
सेयर

बालेनलाई सेयर बजारको स्वागत, फेरि लाग्यो दोस्रो सर्किट, ४० मिनेटलाई कारोबार बन्द

क्यापिटल नेपाल सोमबार, फागुन २५, २०८२

काठमाडौं। निर्वाचनका कारण फागुन २० पछि बन्द रहेर आज खुलेको सेयर बजारमा हरियाली छाएको छ। सेयर बजार ५ प्रतिशतले बढेपछि पुन ४० मिनेटका लागि कारोबार रोकिएको छ।

प्रत्यक्षतर्फको मतगणना अन्तिम चरणमा पुगेको र समानुपातिकमा समेत रास्वपाकै अग्रता रहेका बेला सेयर बजारले नयाँ सरकार र बालेन्द्र शाह बालेनलाई स्वागत गरेको देखिएको छ।

रास्वपाले पछिल्लो मत परिणामअनुसार १२४ प्रत्यक्ष सिटसहित ४६ प्रतिशत बढी समानुपातिक मत प्राप्त गरेसँगै स्थिर सरकारका लागि लगानीकर्ता ढुक्क हुने स्थिति देखिएकाले सेयर बजार उकालो लागेको हो।

नेप्से परिसूचक कारोबार सुरु भएको १ मिनेट मै ४ प्रतिशतले बढेर २० मिनेटको लागि सर्किट ब्रेक लागेको थियो। बजार पुनः ५ प्रतिशतले बढेर ४० मिनेटका लागि कारोबारमा ब्रेक लागेको हो। १३५ अंकले बढेर २८४८.२२ बिन्दुमा पुगेपछि ब्रेक लागेको छ।

निर्वाचनपछि राष्ट्रिय स्वतन्त्र पार्टीले बहुमत हासिल गरेसँगै मुलुकमा राजनीतिक स्थिरता कायम हुने र त्यसले नीतिगत निरन्तरता सुनिश्चित गर्दै अर्थतन्त्र सुधारतर्फ अघि बढ्ने अपेक्षाले लगानीकर्तामा उत्साह बढेको छ।

सेयर बजारमा एक घन्टाअघि ४ प्रतिशतले बढ्दा २० मिनेटलाई ब्रेक लाग्छ भने २ घन्टाअघि ५ प्रतिशतले बढ्दा ४० मिनेटका लागि ब्रेक लाग्छ र ६ प्रतिशतले बढेमा दिनभरका कारोबारमा ब्रेक लाग्ने प्रावधान छ।

प्रकाशित मिति: सोमबार, फागुन २५, २०८२ ११:३४

प्रतिक्रिया दिनुहोस्