आयातकर्तालाई राष्ट्र बैंकको उपहार: नगद मार्जिनमा भारी कटौती, व्यवसायीको अर्बौ रुपैयाँ 'होल्ड' हुनबाट जोगिने

बैंकिङ

गृहपृष्ठ
बैंकिङ

आयातकर्तालाई राष्ट्र बैंकको उपहार: नगद मार्जिनमा भारी कटौती, व्यवसायीको अर्बौ रुपैयाँ 'होल्ड' हुनबाट जोगिने

क्यापिटल नेपाल मंगलबार, चैत २४, २०८२

काठमाडौ‌। नेपाल राष्ट्र बैंकले आयात व्यापारलाई थप सहज र पारदर्शी बनाउन नगद मार्जिनको व्यवस्थामा ठुलो कटौती गरेको छ। केन्द्रीय बैंकले एकीकृत परिपत्र–२०८१ मा संशोधन गर्दै विद्युतीय भुक्तानी प्रणाली लागू भएका भन्सार कार्यालयहरूबाट हुने आयातमा राखिने नगद मार्जिनको सीमा ह्वात्तै घटाएको हो।

संशोधित व्यवस्थाअनुसार विद्युतीय प्रणालीमार्फत भुक्तानी हुने भन्सार विन्दुबाट सामान आयात गर्दा मात्र उद्योगहरू १ प्रतिशत र व्यापारिक फर्महरूले ३ प्रतिशत नगद मार्जिन राख्दा हुने व्यवस्था गरिएको छ। आफ्नै प्रयोजनका लागि कच्चा पदार्थ आयात गर्ने उद्योगहरूले यसअघि २ प्रतिशत नगद मार्जिन राख्नुपर्ने व्यवस्था रहेकोमा त्यसलाई घटाएर १ प्रतिशत मात्र कायम गरिएको हो।

साथै, सामान आयात गरी बिक्री गर्ने व्यापारिक फर्महरूका लागि यसअघि १० प्रतिशत नगद मार्जिन अनिवार्य रहेकोमा अब त्यसलाई भारी कटौती गरी ३ प्रतिशत मा झारिएको छ।

यो सुविधा केवल विद्युतीय भुक्तानी प्रणाली लागू भएका भन्सार कार्यालयहरूबाट हुने आयातमा मात्र उपलब्ध गराएको छ। राष्ट्र बैंकको यो कदमले विशेष गरी औद्योगिक कच्चा पदार्थ र व्यापारिक सामान आयात गर्ने व्यवसायीहरूको कार्यगत पुँजीमा ठुलो राहत पुग्ने अपेक्षा राष्ट्र बैंकको छ।

प्रकाशित मिति: मंगलबार, चैत २४, २०८२ १७:४०

प्रतिक्रिया दिनुहोस्