काठमाडौं। हिमालयन बैंक अब फोनेपे नेटवर्कमा आवद्ध भएको छ। फोनेपे पेमेन्ट सर्भिस लिमिटेड (फोनेपे) ले हिमालयन बैंकलाई औपचारिक रूपमा फोनेपे नेटवर्कमा आबद्ध गरेको हो। यो साझेदारी नेपालको डिजिटल भुक्तानी प्रणालीका लागि एक महत्वपूर्ण उपलब्धि भएको र यसले देशको सबैभन्दा विस्तृत भुक्तानी पूर्वाधारलाई निजी वाणिज्य बैंकिङ क्षेत्रको एक प्रतिष्ठित अग्रणी संस्थासँग जोडेको कम्पनीको भनाइ छ।
सन् १९९३ मा स्थापित हिमालयन बैंक नेपालको प्रतिष्ठित निजी क्षेत्रीय बैंकका रूपमा परिचित रहँदै आएको छ। देशभर फैलिएको शाखा सञ्जाल र तीन दशकभन्दा बढी समयदेखि निर्माण भएको बलियो ग्राहक आधारका साथ, हिमालयन बैंकको फोनेपे नेटवर्कमा एकीकरणले ठूलो स्तरमा डिजिटल भुक्तानीको प्रयोगलाई तीव्र बनाउने अपेक्षा गरिएको कम्पनीले जनाएको छ।
हिमालयन बैंकलाई फोनेपे नेटवर्कमा स्वागत गर्नु नेपालको डिजिटल भुक्तानी यात्राको एक परिभाषित क्षण भएको फोनपेका प्रमुख कार्यकारी अधिकृत दिवस कुमारले बताएका छन्। उनले भने,’नेपाली ग्राहकहरूसँग हिमालयन बैंकले निर्माण गरेको गहिरो विश्वास र फोनेपेका २० लाखभन्दा बढी व्यापारी टचपोइन्टहरूको पहुँचले हामीलाई साँच्चिकै नगदरहित नेपालको दिशामा अझ तीव्र गतिमा अघि बढ्न मद्दत गर्नेछ।‘
हिमालयन बैंकका प्रमुख कार्यकारी अधिकृत अशोक एजजेबी राणाले हिमालयन बैंकले सधैं देशको वित्तीय भविष्य निर्माणमा अग्रपंक्तिमा रहेर नेतृत्व गरिरहेको बताउँदै फोनेपे नेटवर्कमा आबद्ध हुनु विरासतको स्वाभाविक विस्तार भएको बताए। उनले भने,’अब हाम्रा ग्राहकहरूले अन्तरसञ्चालनयोग्य डिजिटल भुक्तानीका सम्पूर्ण फाइदाहरू – छिटो, सुरक्षित, र फोनेपे जहाँ-जहाँ छ त्यहाँ स्वीकार्य – अनुभव गर्न सक्नेछन्।‘
हाल यो साझेदारी प्राविधिक एकीकरणको चरणमा रहेको फोनपेले जनाएको छ। एकीकरण प्रक्रिया सफलतापूर्वक सम्पन्न भएपछि हिमालयन बैंकका ग्राहकहरूले फोनेपे नेटवर्कभर सहज रूपमा कारोबार गर्न सक्नेछन्। यो आबद्धताले नेपालमा समावेशी, अन्तरसञ्चालनयोग्य, र राष्ट्रिय रूपमा एकीकृत डिजिटल भुक्तानी प्रणाली निर्माण गर्ने फोनेपेको निरन्तर प्रतिबद्धतालाई प्रतिबिम्बित गरेको कम्पनीको भनाइ छ।
एफ वान सफ्ट समूहको प्रमुख उद्यमका रूपमा रहेको फोनेपेले देशको अग्रणी क्यूआर-आधारित भुक्तानी पूर्वाधार सञ्चालन गर्दै बैंक तथा वित्तीय संस्था, डिजिटल वालेट, व्यापारी र उपभोक्ताहरूलाई एउटै एकीकृत सञ्जालमा जोडेको छ। कम्पनीका अनुसार, फोनेपेले हाल व्यक्ति–व्यापारी क्यूआर कारोबारमा ९६ प्रतिशत बजार हिस्सा ओगटेको छ र दैनिक २० लाखभन्दा बढी कारोबार प्रशोधन गर्दै प्रतिदिन २० अर्ब रुपैयाँभन्दा बढीको कारोबार सञ्चालन गर्दछ।
फोनेपेका सीमापार भुक्तानी साझेदारीहरू भारत (एनपीसीआई इन्टरनेशनलमार्फत यूपीआई), युनियनपे इन्टरनेशनल, चीन तथा अलीपे प्लसमार्फत विश्वव्यापी सञ्जालहरूसम्म विस्तार भएका छन्। फोनेपे हाल प्रारम्भिक सार्वजनिक निष्कासनमार्फत सार्वजनिक कम्पनी बन्ने प्रक्रियामा रहेको समेत कम्पनीको भनाइ छ।
