काठमाडौं। वायुसेवा सञ्चालक संघ नेपालले सरकार समक्ष वायुसेवा कम्पनीलाई राहत र सहुलियत उपलब्ध गराउन माग गरेको छ। संघले संस्कृति, पर्यटन तथा नागरिक उड्डयन मन्त्रालय समक्ष वैशाख बिहीबार विज्ञप्ति जारी गर्दै कम्पनीलाई राहत र सहुलियत उपलब्ध गराउन माग गरेको हो।
संघकाे विज्ञप्तिमा भनिएको छ– विगतमा विश्वभरि महामारीको रूपमा फैलिएको कोरोना भाइरसका कारण, २३ र २४ भाद्रमा भएको जेन्जी आन्दोलनका कारण तथा हाल मध्यपूर्व क्षेत्रमा जारी द्वन्द्व कारणबाट हवाई इन्धनको मूल्य अत्यधिक रूपमा बढ्नुका साथै हवाई इन्धनको मूल्य वृद्धि भए सँगसँगै सदस्य वायुसेवा कम्पनीहरूको उडान खर्च पनि अत्यधिक वृद्धि हुनुका साथै नेपाल आउने पर्यटकहरूको संख्यामा पनि उल्लेखनीय कमी भएका कारणबाट सदस्य वायुसेवा कम्पनीहरू दिन प्रतिदिन ठुलो आर्थिक संकटमा परि रहनुका साथै यस्तै अवस्था रही रहे भविष्यमा आफ्नो सेवा नै बन्द गर्नु पर्ने अवस्था सृजना हुने तर्फ मन्त्रीसमक्ष ध्यानाकर्षण गराउँदछौँ ।
विश्वव्यापी रूपमा कच्चा तेलको मूल्य बढ्दा हवाई इन्धन पनि अत्यधिक महँगो भएको ब्यहोरा मन्त्रीलाई ध्यानाकर्षण गराउँदै वायुसेवा कम्पनीहरूको कुल खर्चमा इन्धनको हिस्सा पहिला ३०/४० प्रतिशत हुन्थ्यो भने अहिले हवाई इन्धनको मूल्य वृद्धि पश्चात् यो हिस्सा बढेर ५५/६० प्रतिशत पुगेको हुँदा सोही कारणले वायुसेवा कम्पनीहरूको व्यापारमा उल्लेखनीय कमी आउनुका साथै आर्थिक प्रवाहमा समेत ठुलो दबाब परि रहेको ब्यहोरा समेत उल्लेख गरेको छ।
तसर्थ सदस्य वायुसेवा कम्पनीहरूको सेवालाई सुचारु राख्न तथा आम जनसमुदाय एवं यात्रुलाई सर्व सुलभ, मितव्ययी तथा भरपर्दो सेवा प्रदान गर्नका लागि देहाय बमोजिमका राहत तथा सहुलियतहरू तत्काल प्रदान गरिदिनका लागि आवश्यक पहल कदमी गरिदिन मन्त्री समक्ष अनुरोध गरेको छ।
(क) वायुसेवा कम्पनीका लागि लाग्दै आएका नेपाल नागरिक उड्यन प्राधिकरणका विभिन्न शुल्कहरू ल्याण्डिङ पार्किङ, नेभिगेशन, हाउजिङ, भाडा लगायतका अन्य सम्पूर्ण शुल्कहरूमा हालको विषम परिस्थितलाई मध्यनजर गर्दै कम्तीमा पनि ५० प्रतिशत छुट हुनुपर्ने।
(ख) नेपाल सरकारबाट मिति २०७८/१२/३० मा स्वीकृत विमानस्थल सेवा शुल्क नियमावली, २०७८ मा मौसमी शुल्क अन्तर्गत आन्तरिक उडानका वायुसेवाहरूले प्रत्येक उडान वा अवतरण बापत अमेरिकी डलर १० का दरले मौसमी सेवा शुल्क बुझाउनु परि रहेको कारणले वायुसेवा कम्पनीहरूलाई अत्यधिक सञ्चालन व्ययभार पनि थपिने र उडान भाडा दर समेत अत्यधिक हुन जाने भएकोले विमानस्थल सेवा शुल्क नियमावली, २०७८ तत्काल संशोधन गरिनु पर्ने।
