होटल संघ नयाँ बजेटबाट सन्तुष्ट, कार्यान्वयनमा जोड दिन आह्वान

पर्यटन

गृहपृष्ठ
पर्यटन

होटल संघ नयाँ बजेटबाट सन्तुष्ट, कार्यान्वयनमा जोड दिन आह्वान

क्यापिटल नेपाल आइतबार, जेठ १७, २०८३

काठमाडौं। आर्थिक वर्ष २०८३/०८४ को राष्ट्रिय बजेटमा पर्यटन क्षेत्रलाई आर्थिक रुपान्तरणको मुख्य आधारको रूपमा पहिचान गरिएकोमा होटल संघ नेपालले सन्तोष व्यक्त गर्दै घोषित कार्यक्रमहरूको प्रभावकारी कार्यान्वयनका लागि सरकारलाई आह्वान गरेको छ। संघले जारी गरेको वक्तव्यमा २०८५ नेपाल भ्रमण वर्ष, २०२७ आरोग्य वर्ष, निर्वाणपथ, कोशी कोरिडोर, हिलस्टेसन विकास, ग्रेट हिमालयन ट्रेल, मनाङ र मुस्ताङका गुम्बा संरक्षण लगायतका कार्यक्रमले पर्यटकको संख्या, बसाई अवधि र खर्चमा उल्लेखनीय वृद्धि गर्ने विश्वास व्यक्त गरिएको छ।

वर्तमानमा देशभरका होटल तथा रिसोर्टहरूको क्षमताको एक तिहाई मात्र उपयोग भइरहेको कठिन अवस्थामा भैरहवा र पोखराका क्षेत्रीय अन्तर्राष्ट्रिय विमानस्थल सञ्चालनमा निजी क्षेत्रको सहकार्य, नेपाल एयरलाइन्सलाई कम्पनी मोडेलमा सञ्चालन र युरोपियन युनियनको कालो सूचीबाट हट्ने प्रयासले पर्यटक आगमनमा सकारात्मक प्रभाव पार्ने संघले जनाएको छ। होटल उद्योगलाई उत्पादनमूलक उद्योग सरहको मान्यता दिइएको भए तापनि विद्युत उपभोगमा उद्योगले पाउने सुविधा नपाइएको अवस्थामा बजेटले घोषणा गरेको बिजुलीमा भ्याट लागू भएमा होटलको सञ्चालन खर्च बढी अन्तर्राष्ट्रिय बजारमा प्रतिस्पर्धात्मक क्षमता घट्ने भन्दै संघले यस विषयमा सरकारसँग पुनर्विचारको माग गरेको छ।

निजामती कर्मचारीहरूको बढेको तलब र हप्ताको दुई दिने बिदाको उपयोगमार्फत आन्तरिक पर्यटन बढाउन पहिले घोषित निजामती देश दर्शन कार्यक्रम सुचारु गर्न र सरकारी सभा-सम्मेलन होटल तथा रिसोर्टमा गर्न लगाइएको बन्देज खुला गर्न पनि संघले माग राखेको छ। अन्तमा, बजेटमा घोषित कार्यक्रमहरूको समयबद्ध कार्यान्वयन र लेखाजोखाको परम्पराको थालनी सत्तारुढ सरकारको यही पहिलो बजेटबाटै हुनुपर्ने संघको माग रहेको छ।

प्रकाशित मिति: आइतबार, जेठ १७, २०८३ १५:३८

प्रतिक्रिया दिनुहोस्