विश्व वातावरण दिवस मनाइँदै, वातावरणमैत्री स्रोत उपयोगमा राष्ट्रपति र उपराष्ट्रपतिको जोड

पर्यटन

गृहपृष्ठ
पर्यटन

विश्व वातावरण दिवस मनाइँदै, वातावरणमैत्री स्रोत उपयोगमा राष्ट्रपति र उपराष्ट्रपतिको जोड

क्यापिटल नेपाल शुक्रबार, जेठ २२, २०८३

काठमाडौं। विश्व वातावरण दिवस २०२६ आज देशभर विभिन्न कार्यक्रमका साथ मनाइँदै छ। ‘समृद्ध भविष्यको आधारः जलवायु एवं प्रकृतिमैत्री विकास’ मूल नारासहित सप्ताहव्यापी रूपमा मनाउन लागिएको हो।

दिवस अवसरमा वातावरण विभागले ललितपुरमा विशेष कार्यक्रम आयोजना गर्दै छ। विश्व वातावरण दिवसको मुख्य समारोहमा कृषि, वन तथा वातावरणमन्त्री गिता चौधरी प्रमुख अतिथिका रूपमा सहभागी हुने कार्यक्रम छ। वातावरण विभागले विभिन्न सरकारी निकाय, विकास साझेदार, वातावरणविद् तथा सरोकारवाला कार्यक्रममा उपस्थिति हुने जनाएको छ।

विभागका महानिर्देशक ज्ञानराज सुवेदीले वातावरण संरक्षण, जलवायु परिवर्तनका चुनौती सामना तथा प्रकृतिमैत्री विकास प्रवर्द्धनका विषयमा जनचेतना अभिवृद्धि गर्न विश्व वातावरण दिवस विशेष रूपमा मनाउन लागिएको जानकारी दिए। विश्व वातावरण दिवसका अवसरमा देशभर विभिन्न जनचेतनामूलक तथा वातावरण संरक्षणसम्बन्धी कार्यक्रम सञ्चालन गरिने विभागले जनाएको छ।

दिवस अवसरमा राष्ट्रपति रामचन्द्र पौडेल र उपराष्ट्रपति रामसहायप्रसाद यादवले वातावरण स्वच्छ बनाइराख्न सबैको पहल अपरिहार्य रहेकामा जोड दिएका छन्। वातावरणमैत्री स्रोत उपयोग गरेर स्वच्छ वातावरण निर्माणमा लाग्नुपर्ने सुझाव उनीहरुको छ।

प्रकाशित मिति: शुक्रबार, जेठ २२, २०८३ ०६:५९

प्रतिक्रिया दिनुहोस्