मङ्गलबार, कात्तिक २ २०७८ ०५:१५ AM

×

यसपालिकाे दसैंमा च्याङ्ग्राको माग उच्च , मूल्य पनि उच्च

images

काठमाडौं । आठ दिनको हिँडाइपछि मुस्ताङबाट २५ च्याङ्ग्रा लिएर व्यापारी रामबहादुर खत्री बागलुङ आए। वडा दसंमा च्याङ्ग्राको माग उच्च भए पनि भाउ निकै महङ्गिएको छ । 

यसपटकको दसैंमा उनले पहिलो पटक मुस्ताङका च्याङ्ग्रा भेडा बागलुङ भित्र्याएका  छन् । जिल्लाका एक दर्जन व्यापारी दसैंका अवसरमा भेडा–च्याङ्ग्रा लिन हिमालपारीको जिल्ला मुस्ताङ पुग्ने गरे पनि यसपटक थोरै व्यापारी मात्रै हिमालपारी च्याङ्ग्रा लिन पुगेका छन् । तिब्बतबाट च्याङ्ग्रा नआउँदा मुस्ताङका सीमित च्याङ्गा भेडा बजार ल्याइएको छ । 

अहिले मुस्ताङका अधिकांश भेडा च्याङ्ग्रा पोखरा पुर्याइने गरेको छ । केही वर्ष अघि सम्म बागलुङमा मात्रै दुइदेखि तीन हजार भेडा च्याङ्ग्रा भित्रिने भए पनि अहिले त्यसको संख्या घटेर पाँच/सात सयमा झरेको छ ।  मुस्ताङमै भेडा–च्याङ्ग्राको मुल्य बढी भएका कारण थोरै मात्रा भेडा च्याङ्ग्रा लिएर बागलुङ आएको व्यापारी खत्रीले बताए । 

“मुस्ताङमै एउटा च्याङ्ग्राको मूल्य ३२ हजार पर्यो, १/२ हजार नाफा खानै पर्यो बागलमा ३६ हजारमा च्याङ्ग्रा बिक्री गर्ने योजना रहेको छ” उनले भने,“च्याङ्ग्रीलाई समेत १७ हजार बढी मूल्य पर्ने भएको छ, आठ दिनको हिँडा निकै कष्टकर छ, तिब्बतबाट च्याङ्ग्रा नेपाल नआए आगमी दिनमा च्याङ्ग्राको मूल्य छोइ नसक्नु हुनेछ ।” मुस्ताङ पुगेका व्यापारी महेन्द्र केसी र अम्मरबहादुर क्षत्रीले बागलुङतर्फ च्याङ्गा लिएर आउँदै हुनुहुन्छ । 

अहिले जिल्लामा च्याङ्ग्राको मासु प्रतिकेजी १ हजार ८ सय कारोबार सुरु भएको छ । हिमालीक्षेत्रमा जडीबुटी खाएर हुर्केका भेडा च्याङ्ग्राको मासु स्वादिष्ट हुन्छ । अन्य चाडपर्वमा खसी बोका र कुखुराको मासुको माग हुँने भए पनि वडा दसैंमा च्याङ्ग्राको मासु खाने तथा कोसेली लैजाने परम्परा समेत छ । रासस
 

आइतबार​ २४ असोज २०७८ ०८:५० AM मा प्रकाशित

प्रतिक्रिया