×

न्यून मूल्याँकनमा ई–रिक्साको ब्याट्री भित्र्याउने शुभलक्ष्मीमाथि राजस्वको छापा, अन्यको भागाभाग 

images

काठमाडौं । कानुनी छिद्र प्रयोग गरेर न्यून मूल्याँकनमा ई–रिक्साको ब्याट्री भित्र्याएर राज्यलाई ठूलो नोक्सानी पुर्याउँदै आएको सुनसरीको दुहबीमा रहेको शुभलक्ष्मी इन्टरप्राइजेजमाथि राजस्व अनुसन्धान विभागले छापा मारेको छ । विभागले छापा मारेर ४ वर्षको सम्पूर्ण विवरण नियन्त्रणमा लिएको छ । 

images

कानुनी छिद्रमार्फत ई–रिक्साका ब्याट्री आयात, आयकर छलीको आशंका

‘सरकारले ५० डलर भन्दा कम मूल्यांकनमा भित्र्याउन नपाउने व्यवस्था छ । आयातकर्ताले ५० डलर मूल्याँकन गराएर भित्र्याए भने त्यसमा हामीले केही गर्न नसक्ने अवस्था छ’ ओलीले क्यापिटल नेपालसँग कुराकानी गर्दै भने, ‘ब्याट्रीको वास्तविक मूल्य ८०/९० डलर पुगिसकेको हुन सक्छ ।

केही दिन अघिदेखि क्यापिटल नेपाल डटकमले न्यून बिजकीकरणमार्फत भित्रिएका ई–रिक्साका ब्याट्रीको निरन्तर समाचार प्रकाशित गरेपछि अर्थ मन्त्रालय र उमातहतका निकाय भन्सार विभाग, आन्तरिक राजस्व विभागले चासो दिएका थिए । त्यसगत्तै प्रधानमन्त्री तथा मन्त्रीपरिषद् मातहत रहेको राजस्व अनुसन्धान विभागले पनि चासो लिएको थियो । बिहीबार राजस्वका टोलीले शुभलक्ष्मीमाथि छापा मारेर ४ वर्षको सम्पूर्ण कागजात नियन्त्रणमा लिएको हो । 

images

न्यूनबिजकीकरणका ब्याट्रीको बिगबिगीः एउटै कम्पनीका समान प्रडक्टको प्रज्ञापन थरीथरी

न्यूनबिजकीकरणमार्फत भित्र्याइएका ब्याट्री १८ हजार हाराहारीमै बेचिरहेका छन् । तर, १२ हजार चेकमार्फत र बाँकी ६ हजार रुपैयाँ नगद दिएर कारोबार गरिरहेका छन् । यसरी कारोबार गर्दा राज्यले ठूलो परिमाणमा राजस्वसमेत गुमाएको छ । 

शुभ लक्ष्मीले ९० डलरभन्दा बढी मूल्य पर्ने ई-रिक्साको ब्याट्री ६२ डलर मूल्यांकन गराएर पज्ञापन पत्र क्यापिटल नेपालले प्रकाशित गरेको थियो । शुभलक्ष्मी मात्रै होइन्, रुपन्देहीको मणिरन्त मल्टी ट्रेडर्सले ५० डलरको मूल्यांकन गराएर ठूलो परिमाणमा ई–रिक्साको ब्याट्री भित्र्याएको प्रमाण फेला परेको छ । 

images

न्यूनबिजकीकरण भई भित्रिएका ‘ई–रिक्सा’ का ब्याट्री छ्याप्छ्याप्ती, जेन्युनलाई प्रतिस्पर्धा गर्नै धाैधाै

भन्सारका कर्मचारी र व्यापारीको मिलेमतोमा न्यूनबिजकीकरण भई ब्याट्री भित्रिने गरेको खुलेको हो । सरकारले ई–रिक्साको ब्याट्रीको न्यूनतम मूल्यांकन ५० डलर तोकेको छ । त्यसैको फाइदा उठाउँदै व्यापारीले ५० डलरमै मूल्यांकन गराएर ठूलो परिमाणमा ब्याट्री भित्र्याउने गरेका छन् । 

भन्सारको सन्दर्भ मूल्य पुस्तिकामा भएको व्यवस्थालाई गलत तरिकाले प्रयोग गरेर ठूलो परिमाणमा न्यून बिजकीकरणमार्फत ब्याट्री भित्रिरहेका छन् । राजस्वले शुभलक्ष्मीमाथि छापा मारेपछि पूर्वमै रहेका अन्य कम्पनीका सञ्चालकहरु गोदाम बन्द गरेर फरार भएका छन् । आफ्नो कम्पनीमाथि पनि राजस्वले छापा मार्न सक्ने भन्दै उनीहरु गोदाम बन्द गरेर भागेका हुन् । 

न्यून बिजकीकरण गरेर ब्याट्री भित्र्याउँदा राज्यलाई नोक्सानै नोक्सान मात्रै छ । पाउनुपर्ने आयकर गुम्यो, हुण्डीमार्फत कारोबार भयो । जसले भित्रिनुपर्ने डलर पनि नेपाल भित्रिएन । वास्तविक कारोबार देखिएन । 

अर्थसचिव कृष्णहरि पुस्कर, भन्सार विभागका महानिर्देशक कमल भट्टराई, आन्तरिक राजस्व विभागका महानिर्देशक हितेश शाक्य र राजस्व अनुसन्धान विभागका महानिर्देशक झलकराम अधिकारीको संयुक्त प्रयासबाट छापा मार्ने काम भएको हो । 

स्रोतका अनुसार अझै धेरै कम्पनीमाथि राजस्वले छापा मार्नुपर्ने बताउँछन् । ‘शुभ लक्ष्मीले मात्रै न्यून बिजकीकरण गरेर ब्याट्री भित्र्याउँदैन । दर्जनौ कम्पनीको धन्दा नै यही छ,’ स्रोतले भन्यो, ‘बंगलादेशबाट भित्रिने अधिकांश ब्याट्री न्यून बिजकीकरणमार्फत नै आउने गरेको छ ।’
 

शनिबार २८ साउन २०७९ ०२:१७ PM मा प्रकाशित

प्रतिक्रिया