अपी पावरले ४० मेगावाटको माथिल्लो चमेलिया आयोजना बनाउने, ७४० करोड लगानी गर्ने योजना

पूर्वाधार

गृहपृष्ठ
पूर्वाधार

अपी पावरले ४० मेगावाटको माथिल्लो चमेलिया आयोजना बनाउने, ७४० करोड लगानी गर्ने योजना

क्यापिटल नेपाल मंगलबार, मंसिर २४, २०७६

काठमाडौं । निजी क्षेत्रको अपी पावर कम्पनी लिमिटेडले ४० मेगावाटको माथिल्लो चमेलिया जलविद्युत आयोजना बनाउने भएको छ । ८.५ मेगावाटको माथिल्लो नौगाड र ८ मेगावाटको नौगाड आयोजनाबाट विद्युत उत्पादन गरिरहेको अपीले माथिल्लो चमेलिया आयोजना सुरु गर्न लागेको हो । आयोजना आउँदो बैशाखदेखि सुरु गरी ३ वर्ष अर्थात २०७९ मा सम्पन्न गर्ने कम्पनीका अध्यक्ष गुरुप्रसाद न्यौपानेले बताए ।

आयोजना बनाउन ७ अर्ब ४० करोड रुपैयाँ लगानी हुने अनुमान गरिएको न्यौपानेले जानकारी दिए । जसअनुसार ३० प्रतिशत अर्थात २ अर्ब २२ करोड रुपैयाँ सेयर लगानी र बाँकी ५ अर्ब १८ करोड रुपैयाँ बैंक तथा वित्तीय संस्थाको ऋण लगानी हुने छ । आयोजना बनाउन प्रतिमेगावाट लागत २० करोड रुपैयाँ पुग्ने अनुमान गरिएको छ । अपीमा सर्वसाधारणको लगानी रहेको छ ।

बैंकको ब्याजदर बढेका कारण आयोजनाको लागतमा पनि वृद्धि हुन पुगेको अपीले जनाएको छ । आयोजनाबाट २६ करोड ४१ लाख युनिट बिजुली उत्पादन हुने छ । आयोजनाबाट हिउँदमा ३० र वर्षादमा ७० प्रतिशत ऊर्जा उत्पादन हुने छ । आयोजनाबाट उत्पादन हुने बिजुली १३२ केभी बलाँच सवस्टेशनमा जोडिने छ ।

अपीले चमेलियाबाट उत्पादन हुने बिजुली नेपाल विद्युत प्राधिकरणसंग खरिदबिक्री सम्झौता (पीपीए) गरिसकेको छ । विद्युत विकास विभागबाट पनि विद्युत उत्पादन अनुमतिपत्र (लाइसेन्स) प्राप्त गरिसकेको छ । यस्तै सरकारबाट ३ ओटा आयोजनासमेत गरी अपीको जडित क्षमता ५६.५ मेगावाट पुग्ने छ ।

चमेलिया आयोजना दार्चुलाको अपी हिमाल गाउँपालिकामा पर्छ । आयोजनाको मुल संरचना चमेलिया खोलाको बायाँ किनारमा पर्छ । बाँध अपी गाउँपालिका र विद्युतगृह मार्मा गाउँपालिकामा रहेको छ । २०४ मिटरबाट पानी खसालेर ४० मेगावाट बिजुली उत्पादन गर्ने लक्ष्य कम्पनीको छ ।

अपीले चमेलिया आयोजना बनाउनका लागि आवश्यक लगानी जुटाउन २०० प्रतिशत हकप्रद सेयर निष्कासन गर्न नेपाल धितोपत्र बोर्डमा आवेदन दिएको छ । अपीले २ अर्ब २६ करोड ८० लाख रुपैयाँ बराबरको हकप्रद सेयर निष्कासनको तयारी गरेको हो ।

प्रकाशित मिति: मंगलबार, मंसिर २४, २०७६ १७:३६

प्रतिक्रिया दिनुहोस्