काठमाडौं । दोलखाको तामाकोसी गाउँपालिका ५ सहरेका योजनाहरुमा गुणस्तरहीन काम गरेर आर्थिक अनियमितता गरेको भन्दै त्यहाँका एक युवाले छानबिनका लागि प्रमुख जिल्ला अधिकारीलाई अनुरोध गरेका छन् ।
सहरे निवासी भुवन केसीले आफ्ना भएका योजना गुणस्तरहीन भएको र स्थानीय तहको मनोमानी धेरै भएको भन्दै प्रजिअलाई छानबिन गरी आवश्यक कारबाही गर्न आग्रह गरेका हुन् ।
प्रजिअलाई बुझाएको निवेदनमा प्रदेश ३ सरकारमार्फत गत आर्थिक वर्षमा सहरेको भोर्ले, खिम्ती डाँडा, ढाक्रेबाससम्म खनिएको सडकको कटिङ र सोलिङमा परिमाण नपुर्याई गुणस्तरहीन काम गरेको उल्लेख छ । सडकको एस्टिमेटभन्दा कम काम गरेर बढी भुक्तानी लिएकाले सो योजनामा काम गरेका उपभोक्ता समितिका पदाधिकारी र प्राविधिकलाई छानबिन गरी आवश्यक कारबाही गर्न माग गरेका छन् ।
प्रदेश ३ कै बजेटमार्फत सहरेकै किर्ने बजारबाट रिठ्ठाबोट हुँदै भोटेछाप जोड्ने सडकको बस्ती सुरक्षाका लागि लगाइने वालमा समेत उस्तै अनियमितता देखिएको, रिटेनिङ वाल लगाउँदा मापदण्डविपरीत वाल उठाइएको, गुणस्तर नभएको तथा एस्टिमेट अनुसार काम नगरी बढी भुक्तानी लिएको जनाएको छ ।
तामाकोसी गाउँपालिकाको बजेटमार्फत हर्क निर्माण सेवाले गरेको भोर्ले सडकको पुछारबाट ग्याबिन, आरसीसी, पीसीसी, कटिङ जस्ता काममा लापरबाही गरी अनियमितता गरेको, सोलिङका क्रममा माटो सरहका फुस्रे ढुङ्गा हालेको, आरसीसीका कतिपय भागमा रड नराखेको, अन्धाधुन्ध कटिङ गरेर गुणस्तरहीन काम गरेको साथै प्रदेश सरकार र गाउँपालिकाको बजेटका कतिपय कामहरुको डुप्लिकेसन देखिएको बताइएको छ ।
.jpg)
