सहुलियतपूर्ण कर्जा पाउनै नसकेको निजी क्षेत्रको गुनासोपछि अर्थमन्त्री पौडेलले लिए चासो, अध्ययन गर्न निर्देशन

मुख्य समाचार

गृहपृष्ठ
मुख्य समाचार

सहुलियतपूर्ण कर्जा पाउनै नसकेको निजी क्षेत्रको गुनासोपछि अर्थमन्त्री पौडेलले लिए चासो, अध्ययन गर्न निर्देशन

क्यापिटल नेपाल सोमबार, पुस २०, २०७७

काठमाडौं । सरकारले बजेटमार्फत घोषणा गरेको सहुलियतपूर्ण कर्जा कार्यान्वयनलाई थप प्रभावकारी बनाउन राष्ट्र बैंकमार्फत अध्ययन गर्ने भएको छ ।

सहुलियतपूर्ण कर्जा वितरण गरिए पनि लक्षित वर्गसम्म अझै पनि पुग्न नसकेको गुनासाहरू आएपछि हालै मात्र अर्थमन्त्री विष्णु पौडेलको अध्यक्षतामा अर्थ मन्त्रालयमा बसेको वित्तीय समन्वय समितिको बैठकले सहुलियतपूर्ण कर्जाको प्रभावकारिता र कार्यान्वयनको अवस्थाबारे राष्ट्र बैंकलाई अध्ययन गर्न दिने निर्णय गरेको अर्थ मन्त्रालयका सहसचिव रामेश्वर दंगालले बताएका छन् ।

‘अर्थमन्त्रीले सहुलियतपूर्ण कर्जाबारे विशेष चासो देखाउनुभयो । उक्त कर्जाहरूको प्रभावकारिताबारे अध्ययन गरी आगामी बैठकमा प्रतिवेदन पेश गर्न राष्ट्र बैंकलाई जिम्मा दिने बैठकले निर्णय गर्‍यो,’ उनले भने ।

सरकारले यो वर्ष मात्रै कोरोनाबाट प्रभवित भएका निजीक्षेत्रको उत्थानका लागि व्यवसाय निरन्तरता कर्जा कार्यक्रम ल्याएको थियो । तर, त्यसको प्रभावकारी कार्यान्वयन अझै हुन सकेको छैन ।आफूहरूले यस्तो कर्जा पाउनै नसकेको निजीक्षेत्रको गुनासो रहँदै आएको छ ।

उच्चस्तरीय समितिको बैठकमा मन्त्री पौडेलले आर्थिक पुनरुथान गर्न ल्याइएका सहुलियत पूर्ण कर्जाका कार्यक्रमहरू लक्षित वर्गसामु नपुगेको गुनासो आउनु ठीक नभएको बताएका थिए ।

तत्काल अधिकतम पहुँच विस्तार गरी प्रभावकारी कार्यान्वयनमा ध्यान दिन मन्त्री पौडेलले राष्ट्र बैंक र नेपाल बैंकर्स एशोसिएशनलाई मन्त्री पौडेलले निर्देशन दिए । कर्जा प्रवाहको अवस्थाको विवरण नियमित रूपमा अर्थ मन्त्रालयलाई राष्ट्र बैंकले जानकारी गराउने र सार्वजनिक गर्ने निर्णय समेत बैठकले गरेको छ ।

प्रकाशित मिति: सोमबार, पुस २०, २०७७ ०८:३३

प्रतिक्रिया दिनुहोस्