६० करोड लागतमा एकीकृत फोहाेरमैला व्यवस्थापन केन्द्र निर्माण हुने

मुख्य समाचार

गृहपृष्ठ
मुख्य समाचार

६० करोड लागतमा एकीकृत फोहाेरमैला व्यवस्थापन केन्द्र निर्माण हुने

क्यापिटल नेपालशुक्रबार, फागुन २८, २०७७

काठमाडाैं । भीमदत्त नगरपालिकामा ६० करोड रूपैयाँको लागतमा एकीकृत फोहाेरमैला व्यवस्थापन केन्द्र निर्माण हुने भएको छ । एसियाली विकास बैंकको सहुलियतपूर्ण ऋण सहयोगमा सञ्चालित क्षेत्रीय सहरी विकास योजनाअन्तर्गत फोहाेरमैला व्यवस्थापन केन्द्र बनाउन लागिएको हो ।

आधुनिक प्रविधिको फोहाेरमैला व्यवस्थापन केन्द्र निर्माणका लागि राजनीतिक दल, जनप्रतिनिधि र नागरिक समाज सबैले योजना सफल बनाउने प्रतिबद्धता गरेका छन् । फोहाेरमैला व्यवस्थापन केन्द्र निर्माणका लागि सहजीकरण गर्न पत्रकार खेम भण्डारीको संयोजकत्वमा तीन सदस्यीय समिति चयन गरिएको छ । समितिमा गैरसरकारी संस्था महासङ्घ कञ्चनपुरका अध्यक्ष नरेश सिलाल र अधिकारकर्मी प्रभुनिधि पन्तलाई सदस्यका रूपमा राखिएको छ ।

नगरप्रमुख सुरेन्द्र विष्टले आधुनिक सहर बनाउने लक्ष्यअनुसार क्षेत्रीय सहरी विकास योजनाको २० वर्षे योजनाको पहिलो चरणअन्तर्गत फोहाेरमैला व्यवस्थापन केन्द्रसहित अन्य पूर्वाधार निर्माणका कार्यक्रम अगाडि बढाइएको बताए । “फोहाेरमैला व्यवस्थापन केन्द्र निर्माणका लागि नगरपालिकाले कार्यदल गठन गरी अघि बढेको छ”, उनले भने, “योे ठूलो योजनामा थप सहकार्य र समन्वय गर्न आवश्यक छ, त्यसैले सबै पक्षको साथ सहयोगको अपेक्षा राखेका छौँ ।”

नगरपालिकाको बजार र आसपासका क्षेत्रमा अहिले दैनिक सात दशमलव २९ टन फोहाेर निस्कने गरेको छ । नगरपालिकाले महेन्द्रनगर बजारसहित आसपासका ७ सय घरबाट फोहाेर सङ्कलन गर्दै आएको छ । नगरपालिकामा दीर्घकालीनरूपमा फोहर व्यवस्थापन गर्न केन्द्र बनाउन लागिएको हो ।

विसं २०३४ मा स्थापना गरिएको नगरपालिकामा यसअघि डम्पिङसाइट बनाउन पटक–पटक प्रयत्न गरिएको थियो । पछिल्लोपटक आधुनिक प्रविधिसहितको केन्द्र बनाएर फोहाेरमैला व्यवस्थापन गर्ने योजना अघि सारिएको हो । क्षेत्रीय सहरी विकास योजनाअन्तर्गत महेन्द्रनगर बजारसहित आसपास क्षेत्रमा १ अर्ब रूपैयाँ लगानीमा नालीसहितका सडक निर्माण सुरु गरिएको छ । फोहाेरमैला व्यवस्थापन केन्द्र र ३६ किलोमिटर आधुनिक सडक बनाउने योजना छ ।

प्रकाशित मिति: शुक्रबार, फागुन २८, २०७७ ११:२४

प्रतिक्रिया दिनुहोस्