विद्युतीय गाडीको अन्तशुल्क हट्याे, भन्सार पनि घटाइयाे

मुख्य समाचार

गृहपृष्ठ
मुख्य समाचार

विद्युतीय गाडीको अन्तशुल्क हट्याे, भन्सार पनि घटाइयाे

क्यापिटल नेपाल शनिबार, जेठ १५, २०७८

काठमाडौं । सरकारले विद्युतीय गाडीको भन्सार दर घटाउने भएको छ । सरकारले आगामी आर्थिक वर्ष २०७८/०८९ मा विद्युतीयको भन्सार दर घटाउन लागेको हो ।

प्रधानमन्त्री केपी शर्मा ओलीको सम्बोधनमै विद्युतीय गाडीको भन्सार दर घटाउने संकेत गरिएको थियो । ओलीले आफ्नो सम्बोधनमा विद्युतीय गाडीलाई प्रोत्साहन दिने गरी बजेट आउने बताएका थिए । सोही अनुसार अर्थ मन्त्रालयले भन्सार दर घटाउने भएको हो । यद्यपि, कति घटाउने भन्ने खुलाइएकाे छैन ।

खतिवडाले १० प्रतिशत भन्सार लाग्दै आएको विद्युतीय गाडीमा ८० प्रतिशत भन्सार र अन्तशुल्क लगाएका थिए । विद्युतीय गाडीमा कर बढाइएपछि चौतर्फी दबाबका कारणले सरकारले केही कर घटाएको हो ।

५० किलोवाट क्षमतासम्मका विद्युतीय सवारीमा ३० प्रतिशत अन्तःशुल्क लाग्ने गरेको थियो । त्यसलाई घटाएर ८० प्रतिशत छुट दिने निर्णय थियो । ५१ देखि १ सय किलोवाट क्षमताका सवारीसाधनमा ४० प्रतिशत अन्तःशुल्क लाग्नेमा ७५ प्रतिशत छुट दिने निर्णय थियो । त्यसैगरी १ सय १ देखि १ सय ५० किलोवाटसम्म क्षमताका विद्युतीय सवारीसाधनमा ५० प्रतिशत अन्तःशुल्क लाग्ने व्यवस्था भएकोमा ७० प्रतिशत छुट दिने निर्णय भएको थियो । १ सय ५१ किलोवाटभन्दा बढी क्षमताका सवारीसाधनमा ६० देखि ८० प्रतिशतसम्म अन्तःशुल्क लाग्नेमा २५ प्रतिशत छुट दिने निर्णय भएको थियो ।

आगामी आर्थिक वर्षको बजेटबाट उक्त करको दर घटाउन लागिएको बुझिएको छ । विद्युतीय सवारी साधनलाई प्रश्रय दिएर डिजेल तथा पेट्रोलबाट चल्ने सवारी साधनलाई निरुत्साहित गर्नुपर्ने भएकाले करमा केही हेरफेर गर्न लागिएको अर्थ स्रोतले जानकारी दियो । तत्कालीन अर्थमन्त्री डा. युवराज खतिवडाले विद्युतीय गाडीमा कर बढाएका थिए । त्यसलाइ हालका अर्थमन्त्री विष्णुप्रसाद पाैडेलले सुधार्ने प्रयास गरेका छन् ।

प्रकाशित मिति: शनिबार, जेठ १५, २०७८ १३:०८

प्रतिक्रिया दिनुहोस्