डाउन ट्रेन्डमै सेयर बजार, कारोबार अर्ब तल

मुख्य समाचार

गृहपृष्ठ
मुख्य समाचार

डाउन ट्रेन्डमै सेयर बजार, कारोबार अर्ब तल

क्यापिटल नेपाल शुक्रबार, जेठ २७, २०७९

काठमाडौं । सेयर बजारको ओरालो यात्रा साताको अन्तिम दिन शुक्रबार पनि कायम रहेको छ । यस दिन नेप्से सूचक १४.६४ अंकले घटेर २०४८.१६ विन्दुमा आएको छ । कारोबार रकम १ अर्बभन्दा पनि तल झरेको छ । यस दिन ८९ करोड रुपैयाँभन्दा बढीको सेयर कारोबार भएको हो । ३ वटा कम्पनीमा सकारात्मक सर्किट लागेको छ । यसअघि बुधबार एक दिन आकर्षक हिसाबले बढेको बजार त्यसपछि फेरि घट्नेक्रममा लागेको हो ।

आम लगानीकर्ताको मनोविज्ञान कमजोर भएकै कारण बजारले गति लिन नसकेको हो । बजार सुधारका लागि अब आम लगानीकर्ताको मनोबल उच्च पार्ने नीति नियम आवश्यक देखिएको छ । विश्लेषकहरुका अनुसार बजार घटाउन जुन–जुन अस्त्र प्रहार गरिएको थियो अब सुधारका लागि पनि तिनै अस्त्र चलाउनुपर्ने भएको छ । विशेषगरी सेयर धितो कर्जामा ४–१२ करोडको सीमा हटाउनैपर्ने लगानीकर्ताहरुले बताइरहेका छन् ।

यसैगरी, सेयर धितो कर्जामा लागू गरिएको जोखिमभार पनि घटाउनुपर्ने हुन्छ । जोखिमभार १ सयबाट बढाएर १ सय ५० पुर्याइएको छ । अब फेरि १ सयमै ल्याउनुपर्ने लगानीकर्ताको माग छ । जोखिमभार वृद्धि गर्दा बैंकहरुले सेयर धितो कर्जामा बढी रकम प्रोभिजन गर्नुपर्ने तथा लागत बढ्न जाने भएकाले यस क्षेत्रमा कर्जा प्रवाह गर्न वित्तीय संस्था निरुत्साहित हुने अवस्था छ । यसैकारण जोखिमभारको मात्रा घटाउनुपर्ने आवश्यकता देखिएको हो ।

यसैगरी, तरलता सहज बनाई ब्याजदर घटाउन सक्ने किसिमको मौद्रिक नीति बजारले खोजिरहेको छ । केन्द्रीय बैंकले आगामी मौद्रिक नीतिमा यस्तो प्रावधान ल्याउन सकेमा त्यसले पुँजी बजारमा सकारात्मक माहोल पैदा गर्न सक्नेछ । नीतिगत सुधार भएमा बजारले फेरि अग्रगाामी गति लिने विश्लेषकहरुले बताएका छन् । किन भने बजारमा सेयर भाउ निकै सस्तो भइसकेको अवस्था छ ।

सेयर बजार डाउन ट्रेन्डमा लागेको पनि करिब १० महिना भएको छ । यसबीचमा लगानीकर्ताहरुले खरबौं रुपैयाँ गुमाइसकेका छन् । दिनहुँजसो आफ्नो लगानी रकम नै संकुचित हुँदा उनीहरु निराश भएका छन् । यो बजारबाटै पलायन हुने अवस्था आएको छ । यसर्थ, उनीहरुको गिरेको मनोबल उकास्न नियामकले केही आशा लाग्दा र सकारात्मक कार्यक्रम ल्याउन आवश्यक देखिन्छ ।

सेयर बजार निरन्तर घटिरहने तर सुधारका लागि सरकार र नियामकले कत्ति पनि काम नगरेपछि यतिबेला आम लगानीकर्ता आन्दोलित भएका छन् । उनीहरुले विभिन्न मागहरु राखेर सडक आन्दोलनमा उत्रिएका हुन् । मागहरु पूरा नभएसम्म आन्दोलन नरोकिने लगानीकर्ताका अगुवा नेताहरुले बताएका छन् । यसर्थ, बजार सुधारका लागि उपयुक्त नीतिगत व्यवस्थाहरु गर्न सरकार तथा सरोकारवाला निकायहरु बाध्य हुने देखिएको छ ।

यसका लागि सबै लगानीकर्ताहरुको उत्तिकै र सशक्त समर्थन आवश्यक भएको आन्दोलनकारीहरुले बताएका छन् । यस दिन २२९ कम्पनीको ३० लाख ४५ हजारभन्दा बढी कित्ता सेयर कारोबार भएको छ । सबै समुहका सूचक राता भएका छन् । ५ करोड रुपैयाँभन्दा बढीसहित कारोबार रकममा कुमारी बैंक अग्रस्थानमा आएको छ । यसैगरी, दोस्रो र तेस्रो स्थानमा क्रमशः नेपाल इन्भेष्टमेन्ट बैंक र मेगा बैंक परेका छन् ।

प्रकाशित मिति: शुक्रबार, जेठ २७, २०७९ १५:४१

प्रतिक्रिया दिनुहोस्