चौतर्फी दबाबपछि हवाई इन्धन मूल्य एकैपटक ३० रूपैयाँ घट्यो

पर्यटन

गृहपृष्ठ
पर्यटन

चौतर्फी दबाबपछि हवाई इन्धन मूल्य एकैपटक ३० रूपैयाँ घट्यो

क्यापिटल नेपाल आइतबार, पुस २४, २०७९

काठमाडौं। चौतर्फी दबाबपछि नेपाल आयल निगमले हवाई इन्धनको मूल्य एकैपटक ३० रूपैयाँले घटाएको छ। अन्तर्राष्ट्रिय बजारमा हवाई इन्धनको मूल्य घट्दासमेत निगमले भने ७८ रूपैयाँ नाफा लिएको भन्दै चौतर्फी विरोध भएसँगै मूल्य समायोजन गरेको हो।

निगमका सहप्रवक्ता पुस्कर कार्कीले आइतबार राती १२ बजेपछि लागू हुने गरि आन्तरिकमा २० र अन्तर्राष्ट्रिय तर्फ ३० रूपैयाँ घटाएको जानकारी दिए। यसअघिको घाटा पूर्तिसँगै एलपी ग्यासमा दिएको अनुदानको हिसाब मिलान निगमले हवाई इन्धनको बिक्रीबाट गर्दै आएको थियो।

हवाई सेवा प्रदायकदेखि उपभोक्ताले भने जुन प्रयोजनका लागि इन्धन ल्याइएको हो, त्यसमा मात्र नाफा-घाटा हेर्न निगमलाई अनुरोध गर्दै आएका थिए। वायुसेवा सञ्चालकहरूले पछिल्लो समय बढेको इन्धनको मूल्यका कारण सञ्चालन खर्चसमेत उठाउन धौधौ परेको बताउँदै आएका थिए।

कैलाश हेलिकप्टरका प्रवन्ध निर्देशक प्रतापजंग पाण्डेले निगमको पछिल्लो निर्णयले केही मात्रामा व्यवसायीहरूलाई राहत पुग्ने विश्वास व्यक्त गरे। अहिले आम्दानीमा २० प्रतिशत भन्दा बढी रकम हवाई इन्धनमै खर्च हुने गरेको बताउँदै निगमको पछिल्लो निर्णयले केही मात्रामा सहयोग पुग्ने बताए।

यसबाट व्यवसायी मात्र हैन, उपभोक्तालाई समेत राहत पुग्ने उनको भनाइ छ। हवाई इन्धनको मूल्य घटेसँगै स्वतः भाडा समायोजन हुने छ। वायुसेवा सञ्चालक संघका प्रवक्ता एवंम गुण एयरलाइन्सका प्रमुख कार्यकारी अधिकृत योगराज कडेलले महँगिको मारमा परेका उपभोक्तालाई निगमको यो कदमले राहत पुग्ने बताए। ‘व्यवसायीसँगै उपभोक्तालाई समेत सहज हुन्छ,’ प्रवक्ता कडेलले भने, ‘अब संघको वैठक बसेर भाडा समायोजनको निर्णय हुन्छ।’

प्रकाशित मिति: आइतबार, पुस २४, २०७९ २१:०४

प्रतिक्रिया दिनुहोस्