नागढुंगा सुरुङमार्गको काम मंसिर दोस्रो सातादेखि थालिदै, मुख्य सुरुङमार्गकाे काम अघि बढ्न अझै ६ महिना लाग्ने

पूर्वाधार

गृहपृष्ठ
पूर्वाधार

नागढुंगा सुरुङमार्गको काम मंसिर दोस्रो सातादेखि थालिदै, मुख्य सुरुङमार्गकाे काम अघि बढ्न अझै ६ महिना लाग्ने

क्यापिटल नेपालसोमबार, कात्तिक २५, २०७६

काठमाडौं । नागढुंगा सुरुङमार्ग निर्माणको काम मंसिर दोस्रो सातादेखि सुरु हुने भएको छ । सुरुङमार्ग निर्माण गर्न जापानीज ठेकेदार कम्पनी हाज्मा आन्दो कर्पोरेसनलाई कार्यादेश दिने अन्तिम तयारी भएको आयोजना कार्यालयका प्रमुख श्यामप्रसाद खरेलले जानकारी दिए । उनका अनुसार कम्पनलिे नागढुंगा देखि सुरुङमार्गसम्म पुग्ने ३ किलोमिटर बाटो, पुल र फ्लाइओभरलगायतका संरचनाको काम सुरु गर्ने छ ।

मुख्य सुरुङमार्गको काम सुरु गर्न भने ५/६ महिना लाग्ने उनको भनाई छ । ‘अहिले आयोेजना सुरु गर्न कार्यादेश दिने तयारीमा छौं । डिसेम्बरदेखि ठेकेदारले काम थाल्नेछ’ उनले भने, ‘मुख्य सुरुङमार्गबाहेक अन्य पूर्वाधार बनाउन ४÷५ महिना लागिहाल्छ । टनेलको काम थाल्न ५/६ महिना लाग्छ ।’ कात्तिक ४ गते प्रधानमन्त्री केपी शर्मा ओलीले उक्त सुरुङमार्गको शिलन्यास गरेका थिए ।

मुलुकको पहिलो ठूलो सुरुङमार्गका रुपमा अघि बढाइएको आयोजना ४२ महिनाभित्र सम्पन्न गर्ने लक्ष्य छ । चन्द्रागिरी नगरपालिका—१ को टोटेपाखादेखि धादिङको ढुनीबेंसी नगरपालिका—९ सिस्नेखोलासम्म पुग्ने छ । झन्डै २.६८ किलोमिटर लम्बाइको आधुनिक डिजाइन र चिनियाँ मोडेलमा सुरुङमार्ग बनाइनेछ । सुरुङमार्ग बनाउन बिस्फोटक पदार्थको प्रयोग गरिनेछ ।

सुरुङमार्गको गोलाइ अर्थात परिधि साढे १० मिटरको बन्नेछ । अत्याधुनिक र उच्च गुणस्तरको सुरुङमार्गमा दुइओटा फ्लाइओभरसहित बनाइनेछ । यस्तै एक आकस्मिक÷उद्धार सुरुङमार्ग बन्नेछ । सुरुङमार्ग्भित्र दुई लेनको सडक हुनेछ भने दुबैतर्फ दायाँ बाँया पैदलयात्री हिड्न मिल्नेगरी पेटी बनाइनेछ । जापान अन्तर्रा्ष्ट्रिय सहयोग नियोग (जाइका) को साढे १६ अर्ब रुपैयाँ सहुलियत ऋण र ६ अर्ब नेपाल सरकारको गरी साढँ २२ अर्ब रुपैयाँमा लगानी छ । यसले काठमाडौं उपत्यकाभित्रको ट्राफिक जाम आधा कम हुने अपेक्षा गरिएको छ ।

प्रकाशित मिति: सोमबार, कात्तिक २५, २०७६ १६:४१

प्रतिक्रिया दिनुहोस्