पर्यटन प्रवर्द्धनका लागि होटल संघ र बंगलादेश इन्टरनेसनल एसोसिएसनबीच सम्झौता

पर्यटन

गृहपृष्ठ
पर्यटन

पर्यटन प्रवर्द्धनका लागि होटल संघ र बंगलादेश इन्टरनेसनल एसोसिएसनबीच सम्झौता

क्यापिटल नेपालबिहीबार, असार ७, २०८०

काठमाडौं। नेपालको पर्यटन प्रवर्द्धनका लागि होटल संघ नेपाल (हान) र बंगलादेश इन्टरनेसनल एसोसिएसन (बिहा) बीच दुईपक्षिय सम्झौता भएको छ। पर्यटन प्रवर्द्धन र दुवै मुलुकमा आतिथ्य क्षेत्रको विकासका सहकार्यका लागि हानका अध्यक्ष विनायक शाह र बिहाका अध्यक्ष एचएम हकिम अलीले हस्ताक्षर गरेका हुन।

बंगलादेशी पर्यटकमाझ नेपालको बढ्दो आकर्षणलाई मध्यनजर गर्दै देशको पर्यटन प्रवर्द्धन गर्न हानका अध्यक्ष शाहको नेतृत्वमा २४ सदस्यीय होटल व्यवसायीको टोली सोमबार बंगलादेश गएको हो।

हानको आयोजनामा नेपाल पर्यटन बोर्ड र बंगलादेशस्थित नेपाली राजदूतावासको सहयोगमा जुन २१, २०२३ बुधबारका दिन ढाकास्थित होटल सेराटनमा पर्यटन प्रवर्द्धन तथा बिटुबी कार्यक्रम सम्पन्न भएको थियो।

उक्त अवसरमा बंगलादेशका विभिन्न सहरका प्रतिष्ठित संघसंस्था तथा ९० भन्दा बढी पर्यटन व्यवसायीको उपस्थितिमा होटल संघ नेपालको नेपाली प्रतिनिधिमण्डलका २४ होटल सदस्यले बिटुबी कार्यक्रम सम्पन्न गरेका छन। सो अवसरमा सम्बोधन गर्दै हानका अध्यक्ष शाहले यस्ता कार्यक्रमले बंगलादेशबाट नेपाल आउने पर्यटकको संख्यामा बढावा पुग्ने विश्वास व्यक्त गरेका थिए।

कार्यक्रममा बंगलादेशका लागि नेपाली राजदूत घनश्याम भण्डारी, बंगलादेश पर्यटन मन्त्रालयका अतिरिक्त सचिव, बंगलादेश पर्यटन बोर्डका निर्देशक, विभिन्न पर्यटनसँग सम्बन्धित छाता संगठन, सरकारी अधिकारी र सार्क मुलुकको प्रतिनिधित्व गर्ने पत्रकारहरूको उपस्थिति रहेको थियो।

प्रकाशित मिति: बिहीबार, असार ७, २०८० ११:२२

प्रतिक्रिया दिनुहोस्