विश्वप्रकाश शर्माको चुनावी क्षेत्रमा खानेपानी आयोजनाका लागि ३२ करोड सुनिश्चित

अर्थतन्त्र

गृहपृष्ठ
अर्थतन्त्र

विश्वप्रकाश शर्माको चुनावी क्षेत्रमा खानेपानी आयोजनाका लागि ३२ करोड सुनिश्चित

क्यापिटल नेपालशुक्रबार, चैत २, २०८०

झापा। सरकारले मेचीनगर नगरपालिकाको काँकडभिट्टा खानेपानी आयोजना र बुद्धशान्ति गाउँपालिकाको टिमाइ शान्तिनगर एकीकृत खानेपानी आयोजनाका लागि ३१ करोड ८६ लाख रुपैयाँ बजेट सुनिश्चित गरेको छ। झापा क्षेत्र नं १ को सबैभन्दा बढी जनसंख्या भएको २ वटा वडा मेचीनगर-६ काँकडभिट्टा र बुद्धशान्ति–४ शान्तिनगरमा खानेपानी सुविधाका लागि संघीय अर्थ मन्त्रालयले उक्त बजेट सुनिश्चित गरेको हो।

बहुवर्षीय ठेक्का प्रक्रियाबाट कार्य सम्पन्न गर्नेगरी अर्थ मन्त्रालयबाट ३१ करोड ८६ लाख रुपैयाँको स्रोत सुनिश्चित गरिएको संघमा प्रतिनिधित्व गर्ने यस क्षेत्रका सांसद विश्वप्रकाश शर्माले जानकारी दिए। सांसद शर्माका अनुसार टिमाइ शान्तिनगर एकीकृत खानेपानी आयोजनाका लागि १७ करोड ८९ लाख रुपैयाँ र काँकडभिट्टा खानेपानी आयोजनाका लागि १३ करोड ९७ लाख रुपैयाँ बजेट सुनिश्चित गरिएको हो। चालू आर्थिक वर्ष २०८०/८१ को चैत मसान्तसम्ममा ठेक्का प्रक्रिया सुरु भएर ३ वर्षभित्र योजना सम्पन्न हुने शर्माले बताए। दुवै आयोजनाका लागि यही फागुन २१ गतेको अर्थमन्त्रीस्तरीय निर्णयबाट रकम सुनिश्चित गरिएको शर्माको भनाइ थियो।

तुलनात्मक रूपमा बढी जनघनत्व रहेको दुवै क्षेत्रमा खानेपानी सुविधा पुर्‍याउन परियोजनाको निर्माण थालिने सांसद शर्माले बताए। झापा–१ को बाहुनडाँगी, ज्यामिरगढी, दुहागढी, धुलाबारी, चारआली र धाइजन क्षेत्रमा खानेपानी आयोजना सञ्चालन भइरहेका छन्। सांसद शर्माले धुलाबारी, बाहुनडाँगी, ज्यामिरगढी र चन्द्रगढीलगायत खानेपानी योजनामा बजेट उपलब्ध गराउन पहल भइरहेको पनि बताए। रासस

प्रकाशित मिति: शुक्रबार, चैत २, २०८० १३:३३

प्रतिक्रिया दिनुहोस्