'रोबोट्याक्सी’ सञ्चालनमा ल्याउँदै मस्क

अन्तर्राष्ट्रिय

गृहपृष्ठ
अन्तर्राष्ट्रिय

'रोबोट्याक्सी’ सञ्चालनमा ल्याउँदै मस्क

क्यापिटल नेपालआइतबार, चैत २५, २०८०

काठमाडौं। टेस्ला कार उत्पादक कम्पनीका कार्यकारी प्रमुख एलन मस्कले 'रोबोट्याक्सी' (चालकबिना चल्ने कार) ८ अगस्टदेखि सञ्चालनमा ल्याउने घोषणा गरेका छन्। सामाजिक सञ्जाल एक्सका समेत मालिक रहेको मस्कले ८ अगस्ट रोबोट्याक्सी सार्वजनिक गर्ने घोषणा गरेका हुन्।

उक्त उत्पादन टेस्लाको सबैभन्दा महत्त्वपूर्ण उत्पादनमध्ये एक हुने मस्कले दाबी गरेका छन्। टेस्लाले मानव नियन्त्रण नरहने कार बनाउने र टेस्ला कार सफ्टवेयरको माध्यमबाट चालकरहित सवारीलाई प्रोत्साहन गर्दै जाने मस्कले यसअघि सन् २०१९ मै घोषणा गरेका थिए। कारहरूले पूर्ण रूपमा स्वायत्त ट्याक्सीको रूपमा सडकमा आवागमन गर्न र विना कुनै मानवीय सहयोग यात्रुहरूलाई ट्याक्सी चढाउने र झार्ने गर्नुका साथै राम्रो आम्दानी गर्न सक्ने उनले बताए।

अप्रिल सन् २०१९ मा टेस्लाले सन् २०२० सम्ममा ‘रोबोट्याक्सी’ सञ्चालन गर्न थाल्ने उनले बताएका थिए। टेस्ला कम्पनीद्वारा उत्पादित स्वायत्त कार ११ वर्ष टिक्ने र १६ लाख किलोमिटरभन्दा बढी चल्ने तथा यसबाट कम्पनी र कार मालिकले प्रत्येक वर्ष ३० हजार अमेरिकी डलर बराबरको नाफा कमाउन सक्ने उनले बताए।

यद्यपि कहिलेकाहीँ घोषणा गरिएका काम सोचेअनुरूप पूरा हुन नसक्ने तर यसले कुनै न कुनै दिन सार्थकता पाउनेसमेत उनले बताए।'कहिलेकाहीँ मैले सोचेको काम समयमा नभए पनि मैले सोचेको कुरा कालान्तरमा टेस्ला समूहले गरेको छ,' उनले भने।

उपभोक्ताले ‘नयाँ टेस्ला मोडल–३’ कारको खरिद मूल्य ४० हजार अमेरिकी डलरका अतिरिक्त १२ हजार अमेरिकी डलर मूल्य थपेपछि पूर्णरूपमा स्वचालित क्षमताको कार खरिद गर्न सक्ने उनले बताए। पूर्ण स्वचालित क्षमता एक महिनाको १९९ अमेरिकी डलर तिरेर ‘सदस्यता व्यापार मोडेल’को आधारमा खरिद गर्न सकिने उनले जानकारी दिए। रासस/एएनआई

प्रकाशित मिति: आइतबार, चैत २५, २०८० १७:०६

प्रतिक्रिया दिनुहोस्