अर्थतन्त्र

धितोपत्र बोर्डबाट भ्रष्टाचार मुद्दामा बर्खास्त भीष्मराज ढुंगाना लगानी बोर्डको सीईओमा ‘सर्टलिस्ट’

क्यापिटल नेपाल मंगलबार, भदौ २५, २०८१

काठमाडौं । नेपाल धितोपत्र बोर्ड (सेबोन)मा अयोग्य ठहरिएका र हाल अदालतमा मुद्दा खेपिरहेका भीष्मराज ढुंगाना लगानी बोर्ड नेपालको प्रमुख कार्यकारी अधिकृत (सीईओ) छनोटको सर्टलिस्ट सूचीमा परेका छन्। सीईओ छनोट सिफारिस समिति सचिवालयले पाँच जनाको नाम सर्टलिस्ट गर्दा ढुंगानालाई पनि समावेश गर्दै अन्तर्वार्ताका लागि बोलाएको हो।

ढुंगानालाई सर्वोत्तम सिमेन्ट कम्पनीको सेयरको भित्री कारोबार (इन्साइडर ट्रेडिङ) मा संलग्न रहेको पाइएको भन्दै सरकारले सेबोन अध्यक्षबाट २०७८ असोजमा बर्खास्त गरेको थियो। ढुंगानाविरुद्धको मुद्दा अहिले पनि अदालतमा विचाराधीन छ।

अर्थ मन्त्रालयको सिफारिसमा २०७८ असोज १९ को मन्त्रिपरिषद् बैठकले ढुंगानालाई बर्खास्त गरेको थियो। सरकारले यसअघि उनलाई स्पष्टीकरण सोधेको थियो भने जवाफ चित्तबुझ्दो नभएको भन्दै हटाएको थियो।

ढुंगानामाथि लागेको आरोपको सम्बन्धमा जाँचबुझ गर्न गठित समितिले सरकारलाई प्रतिवेदन बुझाएको आधारमा स्पष्टीकरण सोधिएको थियो।

२०७८ भदौ २३ मा ढुंगानाले सर्वोच्च अदालतमा पुनर्बहाली माग गर्दै रिट दायर गरेका थिए। आफूलाई हटाउन लागेको भन्दै सर्वोच्च पुगेका ढुंगानाले उक्त निर्णय बदर माग गर्दै थप दुई निवेदन दर्ता गराएका थिए।