गृह मन्त्रालयले भन्यो– देशभरबाट १७ हजार प्रभावितको उद्धार

समाज

गृहपृष्ठ
समाज

गृह मन्त्रालयले भन्यो– देशभरबाट १७ हजार प्रभावितको उद्धार

क्यापिटल नेपाल बिहीबार, असोज १७, २०८१

काठमाडौं। गृह मन्त्रालयले मनसुनजन्य प्रकोप प्रभावित १७ हजार मानिसलाई देशका विभिन्न स्थानबाट उद्धार गरिएको जनाएको छ। देशभरबाट १७ हजार १२० जनालाई सकुशल उद्धार गरिएको गृहका प्रवक्ता (सहसचिव) ऋषिराम तिवारीले बताएका हुन्।

सैनिक, सशस्त्र, प्रहरी तथा स्वयंसेवकबाट बिहीबार बिहानसम्म उक्त संख्याका प्रभावितको उद्धार भएको हो।

मनसुनजन्य प्रकोपमा परेका २२ जना अझै बेपत्ता छन्। बाढी र पहिरोबाट घाइते भएका १६९ जनाको विभिन्न अस्पतालमा निःशुल्क उपचार भइरहेको छ। मन्त्रालयका अनुसार हालसम्म काठमाडौं उपत्यकाबाट २ हजार १५८, कोसी प्रदेशबाट ९०, मधेसबाट ३५ सबैभन्दा बढी बागमतीबाट १३ हजार ६४० जनाको उद्धार गरिएको छ ।

गृहमन्त्री रमेश लेखकले खोज, उद्धार तथा राहत वितरणका साथै अवरुद्ध राजमार्ग खुलाउन सरोकारवाला निकाय एवं मन्त्रालयसित समन्वय गरिरहेको उनको सचिवालयले जनाएको छ।

सहसचिवको नेतृत्वमा कार्यदल गठन गरी गृह मन्त्रालयले प्रभावित आठ जिल्लामा आवश्यक, समन्वय सहकार्य र विपदमा परेका नागरिकको सहजीकरणका लागि कार्यदल खटाएको छ।

प्रकाशित मिति: बिहीबार, असोज १७, २०८१ १४:०२

प्रतिक्रिया दिनुहोस्