पौडी खेलाडी छनौटमा धाँधली भएको भन्दै सर्वोच्चमा रिट

समाज

गृहपृष्ठ
समाज

पौडी खेलाडी छनौटमा धाँधली भएको भन्दै सर्वोच्चमा रिट

क्यापिटल नेपाल आइतबार, जेठ ३१, २०८३

काठमाडौं। एशियाली खेलकुदको पौडी खेलाडी छनौटमा धाँधली भएको भन्दै खेलाडीहरुले सर्वोच्च अदालतमा रिट दायर गरेका छन्।

पौडीवाज इर्भिन श्रेष्ठ, माधवी केसी र निर्णय थापाले आफूहरूलाई मौका नदिइ नेपाल पौडी संघले आफूखुसी खेलाडी छनौट गरेको भन्दै सर्वोच्च अदालतमा रिट दायर गरेका हुन्। उनीहरूले नेपाल पौडी संघ, नेपाल ओलम्पिक कमिटी र राष्ट्रिय खेलकुदलाई विपक्षी बनाएर रिट दायर गरेका छन्।

अदालतले दुबै पक्षलाई छलफलमा असार ३ गतेका लागि बोलाएको छ। न्यायाधीश श्रीकान्त पौडेलको एकल इजलासले गत शुक्रबार छलफलमा आउन दुवै पक्षलाई बोलाएको हो।

पौडीवाज इर्भिन श्रेष्ठले छनौट पक्रिया अवैधानिक भएको दाबी गरे। पौडीवाज निर्णय थापाले प्रि क्वालिफिकेसनको आधा खेल सकिएपछि अवैधानिक सूचना प्रकाशित गरी अन्तिम क्वालिफिकेशनमा रूपान्तरण गर्नुलाई बदनियतपूर्ण कार्य भएको बताए।

रिटमा खेलाडी छनोट रोकी अन्तिम छनोट प्रतियोगिता गर्न गराउन अन्तरिम आदेश माग गरिएको छ।

रिटमा जेठ २३ र २४ मा आयोजना भएको तेस्रो नेपाल एक्वाटिक स्विमिङ च्याम्पियनशिपबाट पुरुष र महिला गरी ८–८ जना खेलाडी प्रिक्वालिफिकेशन गर्ने सूचना जारी गरिएकोमा २३ गतेको सम्पूर्ण खेल सकिएपछि २४ गते बिहान खेल सुरु हुन लाग्दा उक्त प्रतिष्पर्धालाई अन्तिम छनोट भनी अर्को सूचना प्रकाशित गरी गैरकानूनी कार्य गरिएको उल्लेख छ।

रिट निवेदक खेलाडीहरुले प्रि क्वालिफिकेशनबाट खेलाडी छानी अन्तिम प्रतिष्पर्धा गराउन समेत माग गरेका छन्।

प्रकाशित मिति: आइतबार, जेठ ३१, २०८३ १२:३१

प्रतिक्रिया दिनुहोस्