बेल्जियमद्वारा ई–सिगरेटमाथि प्रतिबन्ध घोषणा

अन्तर्राष्ट्रिय

गृहपृष्ठ
अन्तर्राष्ट्रिय

बेल्जियमद्वारा ई–सिगरेटमाथि प्रतिबन्ध घोषणा

क्यापिटल नेपाल सोमबार, पुस १५, २०८१

काठमाडौं। स्याउ, तरबुजा र कोलालगायत स्वादका कारण युवा पुस्तामाझ लोकप्रिय एकल–प्रयोगका लागि बनेको विद्युतीय–चुरोट (डिस्पोजेबल डिस्पोजेबल ई–सिगरेट) सेवनलाई बेल्जियमले प्रतिबन्धित गरेको छ।

राष्ट्रिय तमाखुविरोधी योजनाको एक भागको रूपमा युवाहरूको स्वास्थ्यको रक्षाका लागी बेल्जियममा सन् २०२५ जनवरी १ देखि ‘डिस्पोजेबल भेप्स (विद्युतीय–चुरोट)’ बेच्न निषेध गरिनेछ।

युरोपियन युनियनले सन् २०४० सम्ममा सुर्तीजन्य पदार्थमुक्त उत्पादन हासिल गर्ने लक्ष्य लिएको छ, जसले २७ देशको समूहको धूमपान गर्ने जनसंख्यालाई हाल २५ प्रतिशतबाट घटाएर पाँच प्रतिशतभन्दा कममा झार्ने छ। ईयूका केही देशले त्यो समयसीमालाई अगाडि ल्याउने योजना बनाएका छन्।

विद्युतीय चुरोटलाई सुरक्षित भनी निर्माताले गर्ने प्रचारका बाबजुद पनि यिनमा निकोटिन हुन्छ र यसले मानिसलाई धूमपानका लागि अत्यधिक लत लाग्छ।

बेल्जियमको धूमपानविहीन समाज गठबन्धन प्रवक्ता नोरा मेलार्डले भनिन्, ‘समस्या के भने युवाहरूले आफ्नो निकोटिनको मात्रा थाहा नपाई भ्याप्स प्रयोग गर्न थाल्छन् र निकोटिन लतमा फस्छन्। युवाहरूले रातको समय उठेर विद्युतीय चुरोट सेवन गर्छन् र यो धेरै चिन्ताजनक विषय हो।’

बेल्जियमले पाँच वर्षपहिले बजारमा आएका डिस्पोजेबल ई–सिगरेटद्वारा उत्पन्न खतराबारे प्रतिक्रिया जनाउँदै सन् २०२१ मा संघीय सरकारले इयूको कार्यकारी निकाय युरोपेली आयोगमा डिस्पोजेबल भेप्समाथि प्रतिबन्ध लगाउने प्रस्ताव पेस गरेको थियो।–एजेन्सी

प्रकाशित मिति: सोमबार, पुस १५, २०८१ १६:३८