राजस्व अनुसन्धान पथलैयाद्वारा साढे ६८ करोड मागदाबीसहित आठ मुद्दा दायर

अर्थतन्त्र

गृहपृष्ठ
अर्थतन्त्र

राजस्व अनुसन्धान पथलैयाद्वारा साढे ६८ करोड मागदाबीसहित आठ मुद्दा दायर

क्यापिटल नेपाल बिहीबार, माघ २४, २०८१

पर्सा। राजस्व अनुसन्धान कार्यालय पथलैयाले चालू आर्थिक वर्षको ६ महिने अवधिमा ६८ करोड ७३ लाख मागदाबीसहित राजस्व चुहावटसँग सम्बन्धित आठ वटा मुद्दा दायर गरेको छ।

कार्यालयले गत आर्थिक वर्षको सोही अवधिमा ५४ लाख माग दाबीसहित राजस्व चुहावटसँग सम्बन्धित एउटा मात्रै मुद्दा दर्ता गरेको थियो। राजस्व अनुसन्धान कार्यालय पथलैयाका प्रमुख अनुसन्धान अधिकृत हरिप्रसाद शर्माले गत आर्थिक वर्षको ६ महिनाको तुलनामा चालू आवको सोही अवधिमा राजस्व चुहावट सम्बन्धित मागदाबी रकम र मुद्दासंख्या उल्लेखनीय रुपमा वृद्धि भएको जानकारी दिए।

‘कार्यालयले चालू आवको ६ महिने अवधिमा ६८ करोड ७३ लाख राजस्व चुहावट मुद्दा मागदाबी रकमसहित आठ वटा राजस्व चुहावटका मुद्दा दर्ता गरेको छ,’ उनले भने, ‘गत आवको सोही अवधिमा राजस्व चुहावट सम्बन्धित एउटा मात्रै मुद्दा दर्ता भएको थियो।’

कार्यालयले चालू आर्थिक वर्षको ६ महिनाको अवधिमा राजस्व चुहावट धरौटी दाखिला रकम करिब ९६ प्रतिशत बढी संकलन गरेको छ। कार्यालयले चालू आवको ६ महिनाको अवधिमा राजस्व चुहावट धरौटी दाखिला रकम दुई करोड ९८ लाख संकलन गरेको छ। जबकि गत आवको ६ महिने अवधिमा भने एक करोड ५२ लाख धरौटी दाखिला गरेको थियो।

कार्यालयले गत आवको ६ महिनाको तुलनामा चालू आवको सोही अवधिमा भिसिटिएस जरिमाना रकममा पनि १२ लाख ४३ हजार बढी संकलन गरेको छ। कार्यालयले चालु आवको ६ महिने अवधिमा भिसिटिएस जरिवाना रकम ४७ लाख ४३ हजार संकलन गरेको छ भने गत आवको सोही अवधिमा भने ३५ लाख संकलन गरेको थियो।

कार्यालयले चालू आवमा विदेशी विनियम मुद्दा संख्या ६ रहेको छ भने गत आवमा पनि यो मुद्दासंख्या ६ नै थियो।

प्रकाशित मिति: बिहीबार, माघ २४, २०८१ १२:१२

प्रतिक्रिया दिनुहोस्