परराष्ट्रमन्त्री चढेको जहाज काठमाडौंमा अवतरण हुनै सकेन, कोलकाता पुग्यो

समाज

गृहपृष्ठ
समाज

परराष्ट्रमन्त्री चढेको जहाज काठमाडौंमा अवतरण हुनै सकेन, कोलकाता पुग्यो

क्यापिटल नेपाल शुक्रबार, फागुन १६, २०८१

काठमाडौं। जेनेभामा राष्ट्रसंघको बैठकबाट स्वदेश फर्कंदै गरेकी परराष्ट्रमन्त्री आरजुर राणा देउवा सवार जहाज त्रिभुवन विमानस्थलमा ओर्लिन नसकेपछि भारतको कोलकाता डाइभर्ट गरिएको छ।

कतार एयरलाइन्सको दोहा उडानबाट काठमाडौं आउँदै गरेकी परराष्ट्रमन्त्री राणा सवार जहाज खराब मौसमका कारण त्रिभुवन विमानस्थलमा ओर्लिन नसकेपछि कोलकाता डाइभर्ट गरिएको हो।

राणाका सल्लाहकार एकराज पाठकका अनुसार परराष्ट्रमन्त्री सवार जहाजलाई काठमाडौं उराल्न धेरैपल्ट प्रयास गरिए पनि मौसम अनुकूल भएपछि कोलकाता लगिएको हो।

आज बिहान काठमाडौं उपत्यकामा हल्का पानी परेको थियो। हल्का पानीसँग काठमाडौंको अकाश तुँवालोले ढाकेको थियो। अहिले उपत्यकाको मौसम खुलिसकेको छैन। सोही कारण हवाई सेवा प्रभावित भएको छ।

मौसम प्रतिकूल भएपछि भिजिबिलिटी कमजोर हुँदा त्रिभुवन अन्तर्राष्ट्रिय विमानस्थलको उडान प्रभावित भएको हो।

त्रिभुवन अन्तर्राष्ट्रिय विमानस्थलका सूचना अधिकारी तेजबहादुर पौडेलले मौसम प्रतिकूल हुँदा तीन वटा अन्तर्राष्ट्रिय उडानका जहाज अवतरण हुन नसकेपछि डाइभर्ट गरिएको बताए।

कतारको दोहाबाट आएको जहाज कोलकाता डाइभर्ट भएको छ भने मलेसियाबाट आएको नेपाल एयरलाइन्स दिल्ली र सिचुवान एयरलाइन्सको जहाज तिब्बतको ल्हासा डाइभर्ट भएको छ।

प्रकाशित मिति: शुक्रबार, फागुन १६, २०८१ १२:२४