संघीय अस्पतालको १ प्रतिशत आम्दानी स्वास्थ्य बिमा कोषमा जम्मा हुने

बैंकिङ

गृहपृष्ठ
बैंकिङ

संघीय अस्पतालको १ प्रतिशत आम्दानी स्वास्थ्य बिमा कोषमा जम्मा हुने

क्यापिटल नेपाल आइतबार, चैत १७, २०८१

काठमाडौं। स्वास्थ्य बिमा सुधारका लागि कोष वृद्धिका विभिन्न विकल्पको खोजी गरिरहेका स्वास्थ्य तथा जनसंख्यामन्त्री प्रदीप पौडेलले संघीय अस्पताल विकास समितिको कुल आम्दानीको एक प्रतिशत कोषमा जम्मा गर्ने निर्णय गरेका छन्। आइतबार मन्त्रीस्तरीय निर्णय गर्दै मन्त्री पौडेलले उक्त निर्णय गरेका हुन्।

स्वास्थ्य बिमा ऐनमा व्यवस्था भएपनि हालसम्म सक्रिय नभएको स्वास्थ्य बिमा कोष सक्रिय बनाउन र सो रकम कोषमार्फत नै जम्मा गर्ने निर्णय भएको मन्त्री पौडेलले बताएका छन्। उनले गरेको उक्त तयारीलाई अर्थ मन्त्रालयले सहमति समेत जनाएको छ। यसले स्वास्थ्य बिमा बोर्डलाई थप स्रोत प्राप्तिका लागि समेत बाटो खुलेको छ। हालसम्म कोष नै सक्रिय नहुँदा स्वास्थ्य तथा जनसंख्या मन्त्रालयमार्फत प्राप्त हुने रकम नै कोषको आयस्रोत बनेको थियो।यस निर्णयसँगै कोषमा केही रकम थप हुने देखिएको छ।

'स्वास्थ्य बिमा कोषलाई बलियो पारेर मात्र स्वास्थ्य बिमा कार्यक्रमको प्रभावकारिता वृद्धि गर्न सकिन्छ भन्ने हाम्रो विश्वास हो,' मन्त्री पौडेलले भने, 'हामीले यस कोष बलियो पार्नका लागि सानो बिन्दुबाट सुधार थालेका हौं।'

मन्त्री पौडेलले आगामी दिनमा स्वास्थ्य बिमा सुधार सुझाव कार्यदलको प्रतिवेदनमा आधारित रहेर थप सुधार कार्य सरकारले अघि बढाउने बताए। उनले प्रगतिशिल प्रिमियम,राज्यका विभिन्न स्वास्थ्य बिमा योजनाको रकमका अतिरिक्त सरकारले दिंदै आएको उपचार सहायता तथा विभिन्न तहका सरकारका नागरिक उपचार सहायतासमेत थपेर कोष बलियो पार्न सकिने राय राख्दै आएका छन्।

मन्त्री पौडेलले बिमा सुधार सुझाव कार्यदलको प्रतिवेदन सार्वजनिक गर्दै राज्यबाट वेतन खाने कर्मचारीहरुको तलबको एक प्रतिशत कर्मचारी र बाँकी एक प्रतिशत राज्यले दिनुपर्ने र स्वास्थ्यमा असर पर्ने पदार्थको करको रकम कोषमा जाने व्यवस्था मिलाउन सकिने बताउँदै आएका छन्। स्वास्थ्य बिमा कोष बलियो पार्न अहिलेको निर्णयले योगदान दिने विश्वास गरिएको मन्त्रालयका प्रवक्ता डा.प्रकाश बुढाथोकीले बताए।

प्रकाशित मिति: आइतबार, चैत १७, २०८१ १२:४३

प्रतिक्रिया दिनुहोस्