भूकम्पको एक दशक, लाप्राकको नमुना बस्ती (तस्बिरसहित)

फोटो फिचर

गृहपृष्ठ
फोटो फिचर

भूकम्पको एक दशक, लाप्राकको नमुना बस्ती (तस्बिरसहित)

क्यापिटल नेपाल शुक्रबार, वैशाख १२, २०८२

७२ वैशाख १२ मा गोरखाको बारपाक केन्द्रबिन्दु बनाएर गएको विनाशकारी भूकम्पले धार्चे गाउँपालिका–४ लाप्राकको ऐतिहासिक गुरुङबस्ती ध्वस्त बनायो।

गैरआवासीय नेपाली संघ (एनआरएनए), तत्कालीन राष्ट्रिय पुननिर्माण प्राधिकरण, सहरी विकास मन्त्रालयबीच २०७३ वैशाख १२ को त्रिपक्षीय सम्झौताअनुसार गोरखाको लाप्राकका भूकम्पपीडितका लागि निर्माण गरिदिएको एकीकृत नमुना बस्ती अझै खाली छ।

धार्चे गाउँपालिका वडा–४ गुप्सीपाखामा करिब ३२६ रोपनी क्षेत्रफलमा सो लाप्राकीका लागि नमुना बस्ती निर्माण गरिएको हो। कुल ६०४ घरधुरी रहेको सो नमुना बस्तीमा ५७३ घर गैरआवासीय नेपाली संघ (एनआरएनए) ले निर्माण गरेको हो भने बाँकी सरकारको भूकम्प राहतबाट बनेको हो।

बस्ती टाढाबाट हेर्दा सुन्दर र आकर्षक देखिए पनि वास्तविकता भने अलि फरक छ। अव्यवस्थित निर्माण, कच्चा र कमसल निर्माण सामग्रीको प्रयोग र परिवारको संख्याअनुसार घर निकै सानो रहेकाले लाप्राकबासीको प्राथमिकतामा पर्दैनन् नमुना बस्तीका घर। ६०४ घर रहेको सो बस्तीमा अहिले ६० परिवार मात्र बस्छन्। प्लास्टिकका झ्यालढोका, चार जना परिवारका लागि पनि सानो हुने घर, पूर्ण रुपमा निर्माण सम्पन्न नगरिएको प्रस्ट देखिन्छ।

अहिले बस्तीमा बसी रहेका परिवारले पनि सो घर बस्न लायक बनाउन २ लाखदेखि ४ लाखसम्म खर्च गर्नुपरेको ४ नम्बर वडा वडाध्यक्ष किसान गुरुङले बताए।