घरघरमा तुलसीको बिउ रोपेर निर्जला एकादशी मनाइँदै, विष्णु मन्दिरमा भक्तजनको घुइँचो

समाज

गृहपृष्ठ
समाज

घरघरमा तुलसीको बिउ रोपेर निर्जला एकादशी मनाइँदै, विष्णु मन्दिरमा भक्तजनको घुइँचो

क्यापिटल नेपालशनिबार, जेठ २४, २०८२

काठमाडौं। वैदिक सनातन धर्मावलम्बीले आ–आफ्नो घरको मठमा आज तुलसीको दल राख्दै छन्। प्रत्येक वर्ष ज्येष्ठ शुक्ल एकादशीका दिन घर घरमा तुलसीको दल राख्ने गरिन्छ। यस दिनलाई निर्जला एकादशी पनि भनिन्छ। यस दिन रोपेको बिउ एक महिनापछि आषाढ शुक्ल एकादशी अर्थात् हरिशयनी एकादशीका दिन रोपिन्छ।

आषाढ शुक्ल एकादशीदेखि कार्तिक शुक्ल एकादशीका दिनसम्म तुलसीको विशेष पूजा गरिन्छ। यसलाई तुलसी हुर्काइबढाई दामोदरसँग विवाह गरिने भन्ने पनि बुझिन्छ। यो चार महिनालाई चतुर्मास पनि भनिन्छ।

चतुर्मासमा स्नान, पूजन र दान गर्नाले मनोकांक्षा पूरा हुने धार्मिक विश्वास छ। निर्जला एकादशीसमेत भनिने भएकाले यस दिन पानीसमेत नपिई व्रत गर्नाले अभीष्ट फल पाइने शास्त्रीय वचन रहेको धर्मशास्त्रविद् एवं नेपाल पञ्चांग निर्णायक समितिका सदस्य प्राडा देवमणि भट्टराईले जानकारी दिए।

सक्नेले पानी नखाई व्रत गरे पनि नसक्नेका लागि फलफूल खाएर बस्न सकिने पनि उनको भनाइ छ। आयुर्वेदिक रूपमा पनि लाभकारी औषधी मानिने तुलसी विभिन्न रोगको उपचारसमेतमा प्रयोग गरिन्छ।

तुलसीमा धेरै अक्सिजन पाइने आधुनिक विज्ञानसमेतले प्रमाणित गरेको छ। यस अवसरमा देशभरका नारायणस्थान एवं विष्णु मन्दिरमा भक्तजनको घुइँचो लाग्छ।

प्रकाशित मिति: शनिबार, जेठ २४, २०८२ ०७:०५

प्रतिक्रिया दिनुहोस्