बंगलादेशले गहुँ आयात गर्न अमेरिकासँग गर्‍यो सम्झौता

अन्तर्राष्ट्रिय

गृहपृष्ठ
अन्तर्राष्ट्रिय

बंगलादेशले गहुँ आयात गर्न अमेरिकासँग गर्‍यो सम्झौता

क्यापिटल नेपाल सोमबार, साउन ५, २०८२

काठमाडौं। आगामी पाँच वर्षका लागि प्रतिस्पर्धी मूल्यमा अमेरिकाबाट वार्षिक सात लाख टन उच्च गुणस्तरको गहुँ आयात गर्न बंगलादेश र अमेरिकाबिच सम्झौता भएको छ।

जुलाईको अन्तिम हप्तामा बंगलादेश र अमेरिकाबिच तेस्रो चरणको शुल्क वार्ता अघि यो सम्झौतामा हस्ताक्षर भएको हो। अमेरिकाले शुल्क सम्झौतामा हस्ताक्षर गर्न निश्चित सुरक्षा सहयोग बढाउनका लागि शर्तहरू लगाएपछि दोस्रो चरणको वार्ता निर्णयविहिन भएको छ।

यसैबिच अमेरिकाले बंगलादेशसँग संयुक्त सैन्य अभ्यास जारी राख्ने घोषणा गरिसकेको छ। गहुँ आयात गर्ने सहमति पत्रमा बंगलादेश सरकारको तर्फबाट खाद्य विभागका महानिर्देशक मोहम्मद अबुल हसनत हुमायूँ कवीर र अमेरिकाको तर्फबाट युएस गहुँ संघका उपाध्यक्ष जोसेफ के सोवरले बंगलादेशका खाद्य सल्लाहकार अली इमाम मजूमदारको उपस्थितिमा हस्ताक्षर गरेका थिए।

हस्ताक्षर कार्यक्रममा बोल्दै खाद्य सल्लाहकार अली इमाम मजूमदारले एमओयूले बंगलादेश र अमेरिकाबीच आपसी व्यापार सहयोगको थप क्षेत्र सिर्जना गर्न र अवसर सिर्जना गरी दुवै देशका जनता लाभान्वित हुने बताए।

देशको समग्र खाद्य सुरक्षा, पोषण गुणस्तर र खाद्य आपूर्ति सुनिश्चित गर्न बंगलादेश र अमेरिकाबिच सम्झौता गरिएको बंगलादेशको अन्तरिम सरकारले विज्ञप्तिमार्फत जनाएको छ।

यसअघि जुलाई ९ को समय सीमाभन्दा दुई दिनअगाडि अमेरिकी राष्ट्रपति डोनाल्ड ट्रम्पले बंगलादेशलाई ३५ प्रतिशत कर लगाउने पत्र जारी गर्दै यो शुल्क अगस्ट १ देखि लागू हुने बताएका थिए।

प्रकाशित मिति: सोमबार, साउन ५, २०८२ १४:४२

प्रतिक्रिया दिनुहोस्