अनुसन्धानको परिणामलाई उत्पादकत्व वृद्धिसँग जोडौंः मन्त्री दाहाल

पूर्वाधार

गृहपृष्ठ
पूर्वाधार

अनुसन्धानको परिणामलाई उत्पादकत्व वृद्धिसँग जोडौंः मन्त्री दाहाल

क्यापिटल नेपालबिहीबार, साउन १५, २०८२

काठमाडाैं। भौतिक पूर्वाधार तथा यातायातमन्त्री देवेन्द्र दाहालले विश्वविद्यालय तथा विज्ञहरुले गर्ने अनुसन्धानको परिणामलाई उत्पादकत्व वृद्धिसँग जोड्न आवश्यक रहेको बताएका छन्। लामो समय लगाएर गरिएका अनुसन्धान कागजमा त्यसै थन्किन नहुने भन्दै त्यसको कार्यान्वयनमार्फत उत्पादकत्व वृद्धिमा उपयोग गरिनुपर्ने बताए।

मकवानपुरको चित्लाङ्स्थित मदन भण्डारी विज्ञान तथा प्रविधि विश्वविद्यालयमा पुगेर त्यहाँ भई रहेका अनुसन्धानबारे जानकारी लिँदै मन्त्री दाहालले विज्ञहरुको ज्ञान र अनुसन्धानलाई त्यसै नथन्क्याउन सुझाव दिए। नेपाली विज्ञ तथा वैज्ञानिकहरुले गहन अध्ययन तथा अनुसन्धान गर्ने गरेको र त्यसको निश्कर्ष तथा परिणामलाई उपयोग हुने वातावरण बनाउन सरकारले ध्यान दिने पनि उनले बताए।

विश्वविद्यालयले गरी रहेको च्याउ, जुम्लीमार्सी, कोदो, विभिन्न बनस्तपति लगायतमा गरेको अध्ययन र प्राप्त नतिजाका आधारमा उत्पादकत्व वृद्धि गराई आर्थिक समृद्धिको यात्रा सहज बनाउन सकिने समेत उनको भनाइ थियाे।

विश्वविद्यालयका अध्यक्ष राजेन्द्रध्वज जोशीले अहिले सम्म विश्वविद्यालयले खेर जाने कुनै पनि अनुसन्धान नगरेको र गरेका अनुसन्धानका नतिजा किसान तथा उद्यमीसम्म पुर्‍याउने वातावरण बनाउन आवश्यक रहेको बताए। अवलोकनका क्रममा पुगेका प्रधानमन्त्रीका आर्थिक सल्लाहकार डा. युवराज खतिवडाले अनुसन्धानबाट प्राप्त हुने नतिजाका आधारमा कृषि पर्यटन, कृषि उद्यमलगायतको विकास गर्न सकिने बताए। नेपाली विश्वविद्यालयहरुमा समेत विभिन्न देशका विद्यार्थीहरु अध्ययनका लागि आउन इच्छुक हुने वातावरण बनाउन जरुरी रहेको उनकाे भनाइ छ।

प्रकाशित मिति: बिहीबार, साउन १५, २०८२ १५:५७

प्रतिक्रिया दिनुहोस्