काठमाडौं। रुपन्देहीको भैरहवामा रहेको टाइगर वान प्रालिले व्यापारमा छलाङ मारेको छ। कम्पनीद्वारा सञ्चालित नेपालको पहिलो इन्टिग्रेटेड रिसोर्ट टाइगर प्यालेस बाई सोल्टीले एक वर्षे अवधिमा ७७.३१ प्रतिशत व्यापार बढाएको हो।
गत आर्थिक वर्षमा कम्पनीले ४२ करोड २० लाख रुपैयाँको व्यापार गरेको छ। अघिल्लो आर्थिक वर्ष २०२४ मा कम्पनीले २३ करोड ८० लाख रुपैयाँको व्यापार गरेको थियो।
सन् २०१४ मा स्थापित टाइगर वानले इन्टिग्रेटेड पाँचतारे रिसोर्ट तथा क्यासिनो सञ्चालन गरेर आव २०२३ मा १२ करोड ९० लाख रुपैयाँ, आव २०२२ मा ७ करोड ६० लाख र आव २०२१ मा १ करोड ६० लाख रुपैयाँ बराबरको व्यापार गरेको थियो।
नेपालको पहिलो इन्टिग्रेटेड (एकीकृत) रिसोर्ट तथा क्यासिनो ७ हेक्टरमा फैलिएको छ भने १०२ वटा कोठा सञ्चालनमा छन्।
रिसोर्टमा सिल्भर हेरिटेज इन्भेस्टमेन्ट कम्पनीको शतप्रतिशत सेयर स्वामित्व छ। गत वर्षदेखि सोल्टीले व्यवस्थापन सम्हालेपछि टाइगर प्यालेसको व्यापारमा ठूलो सुधार हो। त्यसअघि टाइगर प्यालेस रिसोर्टमा सञ्चालित रिसोर्टलाई सोल्टीले टाइगर प्यालेस बाई सोल्टीको रुपमा रिब्रान्ड गरिएको गरेको थियो।
कम्पनीले बैंकिङ कर्जा प्रयोजनका लागि रेट्रि एजेन्सी इक्रा नेपालमा रेटिङ गराएको छ। यसमा कर्जा सिमा इक्राले २ अर्ब ४९ करोड रुपैयाँ निर्धारण गरेको छ। तर, अघिल्लो पटक दिइएको रेटिङ दीर्घकालीन कर्जाको ‘एलडी’ र अल्पकालिन कर्जाको ‘डी’ भने आवश्यक वित्तीय विवरण उपलब्ध नगराएको भन्दै हटाएर ‘इस्युअर नट कर्पोरेटिङ’ मा राखेको छ।
कोभिड–१९ महामारीका कारण होटलको व्यवसायमा ठूलो असर परेको थियो, जसले बैंक ऋण तिर्न पनि कठिनाइ भएको थियो। खासगरी, क्यासिनो पूर्ण रुपमा बन्द हुँदा व्यापारमा धेरै धक्का पुगेको थियो। सन् २०२४ को मध्यबाट मात्र क्यासिनो सञ्चालनमा आएको थियो।
कोभिडपछिको कम व्यापारका कारण होटलले समयमै ऋण तिर्न सकेको छैन र ३० दिन बढी ढिलाइ हुने गरेको इक्राले रिपोर्ट गरेको छ। यद्यपि, कम्पनीको व्यापार विस्तारै लयमा फर्किरहेको छ।
सन् २०२१ देखि सञ्चालन घाटामा रहेको यो होटल गत वर्षदेखि सञ्चालन नाफामा आएको छ। गत वर्ष यसको नाफा मार्जिन ५२.८ प्रतिशत कायम भएको छ।
